DILI, 30 Juñu 2025 (TATOLI) – Sekretáriu Ezekutivu Komunidade País Ko’alia Lian Portugés (CPLP, sigla portugés), Zacarias Albano da Costa, hasoru malu ho Prezidente Parlamentu Nasionál (PPN), Maria Fernanda Lay, hodi aprezenta kona-ba balansu atividade durante mandatu tinan haat lidera organizasaun ne’e.
Zacarias Albano hato’o mós agradesimentu tanba hetan konfiansa husi Timor-Leste nu’udar Sekretáriu-Ezekutivu ba CPLP iha mandatu dala rua tuir malu.
“Jullu 31, ha’u hakotu ha’u-nia mandatu, entrega fali ba sekretáriu-ezekutivu foun husi Angola”, nia informa.
Nia sente importante atu hasoru malu ho autoridade Timor-Leste nian hodi hato’o atividade ne’ebé halo ona no saida mak daudaun la’o hela iha nasaun sira ne’ebé hola parte iha CPLP. “No simeira Xefe Estadu no Xefe Governu ne’ebé sei hala’o iha Giné-Bisau iha 18 Jullu”, akresenta.
Nia hato’o serbisu partikularmente ho asembleia Parlamentár CPLP ne’ebé Parlamentu Nasionál Timor-Leste mós hola parte, partisipasaun iha atividade barak durante tinan haat no kompromisu sira ne’ebé sei kontinua.
“Agradese ba Parlamentu Nasionál ne’ebé fó liuhusi Prezidente Parlamentu Nasionál ba serbisu ne’ebé hala’o”, nia dehan.
Antigu Ministru Negósiu Estranjeiru no Kooperasaun relata durante mandatu balansu serbisu sira ne’ebé halo mak hanesan ratifikasaun akordu mobilidade CPLP husi Estadu-membru sira hotu nu’udar momentu istóriku tebes, mezmu ho dezafiu sira.
“Balansu pozitivu satisfeitu tebes durante tinan haat no dezafiu barak iha implementasaun akordu mobilidade. Dezafiu iha inísiu ho objetivu jerál pilár ekonómiku, dezafiu reestruturasaun sekretariadu ho seluk tan to’o ikus la’ós CPLP, maibé komunidade internasionál enfrenta iha mundu transformasaun”, dehan.
Lembra katak Konsellu Ministru aprova, iha 2023, aprezentasaun rekandidatura Zacarias Albano da Costa ba kargu Sekretáriu-Ezekutivu CPLP ba mandatu tinan rua tan husi 2023 to’o 2025.
Zacarias Albano da Costa asume knaar nu’udar Sekretáriu Ezekutivu CPLP iha períodu dahuluk iha tinan 2021-2023.
Tuir estatutu CPLP nian, bainhira mandatu Sekretáriu-Ezekutivu termina bele renomeia dala ida tan tuir desizaun Xefe Estadu no Governu-sira membru CPLP.
Eis-membru Parlamentu Nasionál husi Bankada Partidu Sosiál Demokrata (PSD) ne’e simu pose hodi asume knaar Sekretariu Ezekutivu CPLP iha Luanda, 17 jullu 2021.
Zacarias Albano da Costa, moris iha Remexiu (Aileu), iha loron 16 janeiru 1964. Nia mós iha esperiénsia asume knaar importante no estratéjiku iha ajénsia internasionál lubun iha Timor-Leste dezde tempu UNTAET to’o mai Timór restaura nia independénsia iha 20 maiu 2002.
Notísia relevante: Zacarias Albano atualiza serbisu Sekretáriu Ezekutivu CPLP ba PPN
Jornalista: Nelson de Sousa
Editora: Maria Auxiliadora
