DILI, (TATOLI) – Komisaun Nasionál ba Eleisaun (Comissão Nacional de Eleições-CNE), hahú ona apuramentu nasionál ba akta sira hosi munisípiu hotu durante oras 72 hafoin enkamiña prosesu ba Tribunál Rekursu.
“Hosi CNE atribui baze legál hodi halo apuramentu ba akta sira ne’ebé mai hosi munisípiu hotu”, Prezidente órgaun eleitorál, Alcino Barris ba jornalista sira iha salaun CNE, Kolmera, Kinta, (23/3).
Apuramentu hahú 23 to’o 25 hafoin submete ba tribunál atu proklama. Tuir nia, apuramentu hahú tuku 8:00 to’o 24:00 kalan.
Prosesu, nia esplika, simu materiál sira hosi munisípiu no halo termu entrega hodi ba rai sasan iha fatin seguru, faze hahú prosesu apuramentu nian ho etapa lima hodi verifika akta sira hosi sentru votasaun tuir prosedimentu ka transfere ba meza ida-idak ne’ebé asume inkui prosesu verifikasaun munisípiu remata, rai dokumentu eleitorál depois tau iha urna hafoin haruka ba armajenazen.
Prosesu ne’e, sei hala’o tuir ordem alfabétiku hosi munisípiu sira, hahú Aileu to’o Viqueque no ikus ba akta hosi Portugal no Austrália, realsa.
Materiál urna ho selu numériku, urna nia laran tenke iha akta orijinál hosi sentru votasaun ida-idak ho ordenasaun konforme lista ordem sentru votasaun iha munisípiu nian.
Akta ida hosi munisípiu ida-idak ka akta apuramentu munisípiu, envelope ida seladu ho identifikasaun ho votu reklamadu mak mosu iha kontajen votu nian inklui envelope ida ho formuláriu reklamasaun kona-ba kontajen votu iha sentru votasaun ka iha apuramentu munisípiu.
Prazu apuramentu nasionál tenke remata iha semana ida, CNE tenke prepara akta apuramentu nasionál provizóriu iha sede nasionál ho kopia ba Sekretariadu Tékniku Administrasaun Eleitorál (STAE) no orgaun kamunikasaun sosiál.
CNE deside kedas prosesu apuramentu nasionál hahú bainhira materiál hotu-hotu hosi munisípiu tama iha salaun apuramentu.
Importante tebes hodi asegura justisa no imparsialidade iha prosesu nia laran.
Jornalista: Zezito Silva
Editora: Rita Almeida
