DILI (TATOLI) – Governu Timor-Leste sei halo pagamentu ho moeda USD (dollar amerikanu nian) ba Asian Development Bank (ADB) hodi halo selu deve ne’ebe governu empresta hodi uza ba Projetu Estrada diresaun Manatuto – Baucau.
Utilizasaun moeda USD ne’e, governu desidi no aprova iha enkontru konsellu ministru, 28 Marsu 2017.
Vise Ministru Financas, Helder Lopes hateten, total orsamentu nebe’e Governu empresta husi ADB hamutuk milloens US$ 49.650 iha tinan 2016. Iha imprestimu ne’e hatete katak atu selu fila fali emprestimu tenki ho SDR (metodu ida neeb’e ita tau moeda sira ne’e hotu depois nia valor ne’e maka tenki konverta ho osan seluk.
Maski Governu konsidera sistema pagamentu ne’e risku ba TL, maibe ADB aseita Governu halo pagamentu ho USD.
“Konselhu Ministru aprova ita sei selu ho dollar nune’e ita sei amenda ba akordu ne’ebe ita estabelese ona ho ADB ne’e,” realsa Helder Lopes, iha Palacio do Governo, Dili.
Projeitu estrada Manatuto-Baucau ne’e implementa ona iha 2016 no sei termina iha 2019.
Jornalista: Agapito dos Santos / Editor: Gantry Meilana
