Díli (TATOLI) – Prezidente Eleitu Francisco Guterres, Lu’olo, hakarak povu tenke partisipa iha seremonia tomada de posse ba nia kargu nudar prezidenti republika, inklui komemorasaun loron restaurasaun independénsia, iha Tasitolu, Díli.
“Atu kumpri ninia kompromisu eleitorál, ne’ebé hateten sei sai prezidente ba povu tomak, Prezidente Eleitu, Francisco Guterres, Lu’olo, propoin atu konvida ema nain haat iha suku idaidak hosi suku 442 hodi reprezenta sira nia povu atu partisipa iha komemorasaun loron restaurasaun independensia no serimonia tomada de posse ba prezidente foun ne’ebé sei hala’o iha 00.00 oras iha Tasitolu, Díli,” hateten Antonino Bianco, nuudar reprezentante Prezidente Eleitu nian iha Komisaun Organizadora, ba preparasaun komemorasaun loron restaurasaun independensia 20 de maio foin lalais ne’e. (Lee mos: PR Eleitu Sei Simu Pose iha Tasitolu)
Edgar Sequira Martins, nuudar Sekretáriu iha komisaun organizadora nian, hateten “Konvidadu sira ne’ebé sei konvida hodi partisipa iha serimonia sira 20 de maio nian besik ema 3.000. bainaka sira ne’e, kompostu hosi, bainaka rai laran no bainaka espesiál balun hosi rai liur nian,” Edgar hateten iha sorumutu preparasaun komisaun organizadora nian (31/03), iha MAE. (Lee mos: Semana Oin, MNEK Sei Distribui Konvite ba Bainaka Espesiál)
Diretór Jerál iha Ministériu Administrasaun Estatál nian ne’e, informa tan, Komisaun Organizadora mos sei mobiliza povu sira hosi postu administrativu neen ne’ebé partensia ba iha Munisipiu Díli nian hodi partisipa iha serimonia ne’e. aleinde ne’e, iha munisipiu sira seluk, sei iha alokasaun fundus hosi Komisaun Organizadora atu utiliza hodi selebra loron restaurasaun ne’e iha idaidak ninia munisipiu.
Edgar hateten tan, atu asegura, povu tomak partisipa no asiste serimonia tomada de pose Prezidente foun nian ne’e, Rádiu no Televizasaun Timor-Leste, sei oferese transmisaun direta iha territóriu nasionál no oferese mos live streaming hodi fasilita timoroan sira iha rai liur bele akompaña mós.
Komisaun Organizadora ba preparasaun komemorasaun aniversáriu restaurasaun independensia badala 15 no serimonia tomada de posse prezidente foun, preside hosi Ministru Estadu no Kordenador ba Asuntu Administrasaun Estadu no Justisa, nomos Ministru Administrasaun Estatál (MECAAEJ), Dionísio Babo ho partisipasaun hosi reprezentante sira gabinete Prezidente Atuál nian, Gabinete Prezidente Parlamentu Nasionál, Gabinete Primeiru-Ministru, liñas ministeriais no reprezentante Gabinete Prezidente Eleitu nian.
Ekipa Kobertura / Editór Gantry Meilana
