DÍLI (TATOLI)- Governu liuhusi Ministru Interiór, Longuinhos Monteiro ho Prezidente Repúblika Taur Matan Ruak iha Kuarta (05/04/2017) hala’o diskusaun kona-ba menus fasilidades ne’ebeé Polisia Unidade Patrullamentu Fronteira (UPF) enfrenta.
ʺOhin Prezidente mós husu para ha’u despoin situasaun ne’e husi nivél Polítiku ba iha Komando Jerál PNTL para bele haree lalais situasaun kondisaun UPF,ʺ dehan Ministru Interiór Longuinhos Monteiro iha Palásiu Prezidensiál Dili.
UPF enfrenta falta ekipamentus hanesan edifísiu no rádiu komunikasaun iha aréa fronteira ho Indonézia.
ʺLa’os haree deit ba bem estar sira-nia maibé ba ekipamentus para sira bele hala’o sira nia funsaun ho di’ak,ʺ tenik membru governu ne’e.
Iha okaziaun ne’e Prezidente Repúblika subliña, UPF reprezenta estadu hodi halao kna’ar iha Fronteira ho nasaun indonézia tanba ne’e tenke hetan tratamentu espesiál husi Estadu.
ʺPolitikamente sei tau nafatin perioridades ba UPF, diresaun nasionál tránzitu no rodaviáriu no Polisiamentu Komunitáriu ba área perioridade ba dezenvolvimentu setór Seguransa,ʺ tenik Ministru Interiór.
Jornalista: Agapito dos Santos / Editor: Gantry Meilana
