DÍLI (TATOLI) – VI Governu Konstitusionál liuhusi prezidénsia Konsellu Ministru deside toleránsia pontu ba semana santa nian hahú husi tuku 12:00, Kinta ohin (13/04/2017).
Toleránsia pontu ne’e ba funsionáriu no ajente sira hotu husi Ministériu no servisu sira ne’ebé depende ba sira, nune’e mós ho institutu no organizmu sira ne’ebé integra iha administrasaun indireta estadu nian.
Tuir komunikadu Prezidénsia Konsellu Ministru nian katak, desizaun ba toleránsia pontu ne’e bazea ba lei n.10/2005, loron 10 fulan-agostu, ne’ebé determina loron hirak ne’ebé sai nu’udar feriadu nasionál, data ofisiál komemorasaun nian no toleránsia pontu.
Desizaun ida ne’e foti tanba selebrasaun sira Kinta Santa, loron ikus Kuarezma nian, iha kalendáriu relijiaun katólika, ne’ebé tinan ida ne’e, monu iha Kinta (13/04/2017).
Informasaun ne’e bele asesu mós iha link ne’e: http://timor-leste.gov.tl/?p=17698&lang=tp
Jornalista: Rafy Belo / Editor: Gantry Meilana
