DILI, (TATOLI) – Governadór Austrália, Peter Kosgrove pozitivu partisipa iha tomada pose Prezidente Repúblika eleitu, Francisco Guterres Lú-Olo no Restaurasaun Independensia Timor-Leste ba dala 15 ne’ebé sei hala’o iha Tasi-Tolu, 20 maiu 2017.
Partisipasaun eis Komandante INTRERFET tinan 1999 iha seremónia boot rua ne’e tanba hetan konvida direta hosi Prezidente Repúblika eleitu iha Brisbane Austrália, 23 abril liu-ba, bainhira prezidente eleitu partisipa seremónia Loron Aniversáriu Veteranu Austrália (ANZAC DAY).
Tuir informasaun ofisiál ne’ebé TATOLI simu hosi Mídia Prezidente Repúblika eleitu iha sesta ne’e katak Governador Jerál simu konvite refere sai loron ne’ebe maka haksolok tebes ba nia atu partisipa momentu importante ne’e no promete sei tau medalla kondekorasaun ne’ebe maka Estadu Timor-Leste oferese ba nia.
Enkuantu, Prezidenti eleitu sente prazer boot ba nia no povu Timor-Leste en-jerál bainhira relembra fali kontribuisaun ne´ebé maka Peter Kosgrove halo ba Nasaun durante misaun hanesan Komandante INTERFET iha 1999.
Jornalista: Xisto Freitas
Editora: Rita Almeida
