DILI, (TATOLI) – Artista seniór no emprezáriu timoroan, Jorge Serano husu ba artista múzika timoroan sira atu hadi’a kualidade múzika tanba dalabarak múzika Timor ne’e la fó mensajen lójika—intro ko’alia oin ida no ending hateten oin seluk.
Jorge haktuir múzika sira Áfrika tama iha Timor maibé múzika TL labele tama iha nasaun Comunidade País da Língua Portuguesa (CPLP) tanba laiha kualidade. Tuir nia katak ida ne’e maka dezafiu boot no fila fali ba ida-idak nia konsiénsia.
“Ita Timor nia frakeza maka hanesan fohorai. Fohorai kuandu han bosu, toba dukur ona. Nunka kreativu. Ita lalais adapta ema seluk nia múzika maibé nunka dezenvolve ita nia án rasik. Ne’e boot”, dehan nia bainhira sai oradór ba kongresu Associação de Músicos de Timor-Leste (Almamor) ba datoluk ne’ebé hala’o iha Sentru Konvensaun Dili (CCD), kinta horsehik.
Nia esplika merkadu Timor ne’e kiik teb-tebes maibé la signifika katak múzika labele dezenvolve no labele sai indústria ida ne’ebé.
Merkadu bele kiik maibé potensiál tanba rai ne’ebé de’it kuandu iha banku rua ba leten, púrke merkadu iha pontesiál boot. “Timor ohin loron iha banku estranjeiru haat, banku nasionál ida no sei mai tan banku hosi Árabe, Ázia no Áfrika. Ne’e signifika katak Timor iha merkadu potensiál”, akresenta.
Iha biban ne’e, artista senior ne’e triste tanba eventu barak maka hala’o maibé la promove múziku timoroan sira. Ne’e traballu kaza ba Almamor katak aban bainrua sé maka organiza eventu ruma koordena mós artista timoroan sira para sai bainaka iha nia rain rasik.
“Dala barak ha’u kontra buat ida ne´e. Eventu ruma ita hasai osan atus rihun dólar hodi selu artista sira hosi rai liur, maibé ita nia maluk artista sira rai laran ita selu de’it rihun lima dólar maibé ita dada iis tiha ona. Ida ne’e tanba saida? Tanba parte ida ita (artista) mós lakohi hatudu ita nia kbiit katak ita bele organiza buat ruma ho didi’ak”, afirma.
Jornalista: Xisto Freitas
Editora: Rita Almeida
