DILI, (TATOLI) – Governu liuhosi Sekretaria Estadu Para Apóiu no Promosaun Sosiu-Ekonómika Mulher (SEM), Veneranda Lemos Martins hateten ninia parte kontinua haree ba igualdade jéneru hodi atinje Objetivu Dezenvolvimentu Sustentavel (ODS).
“ODS iha meta 17, SEM nia meta lima ba igualidade jéneru, atu atinje meta ne’e SEM iha programa ne’ebé agora dadaun la’o”, tenik governante ne’e ba jornalista sira hafoin intervalu konferénsia nasionál iha Otél Novo Turizmu, kuarta (10/5).
Hodi hatutan, programa ida mak aborda integrar jéneru liuhosi liña ministeriál sira, SEM tenke asegura igualdade jéneru iha programa, politika, planu asaun anuál kada ministériu, planu asaun nasionál hanesan igualidade jéneru, planu asaun nasionál feto pás no seguransa.
Meta sira ne’e hotu mak SEM tenke asegura, atu kada planu iha munistériu relevante bele hatama asuntu igualdade jéneru, asegura iha politika, programa no orsamentu.
Alende ne’e, foka ba sitasaun, grupu traballu jéneru atu haree ba nível nasionál to’o suku sira, asegura igualdade jéneru iha programa no orsamentu.
“Liuhosi kapasitasaun feto sira iha vida polítika, ekonomia no polítika mak liuhosi fundu transparénsia, SEM fó apoi ba Fundasaun Pátria no Caucus atu fó kapasitasaun no prepara feto sira atu partisipa polítika, kandita-án ba autoridade lokál”.
Feto iha vida ekonomia, SEM apoiu hakbiit rendimentu ba grupu nomos família. Liuhosi monotorizasaun, avaliasaun, kapasitasaun no servisu hamutuk institutu no apoiu dezenvolvimentu emprezariál, kapasitasaun ba grupu feto sira iha área jestaun negósiu, planu negósiu, jestaun orsamentasaun.
Programa sira ne’e, SEM nomós Rede Feto no nia membru sira kapasita Rede Feto nia membru sira atu bele lori feto sira ba vida moris ne’ebé diak liutan.
“Ita iha tinan 15 nia laran atu atinje ODS, kada ministériu mak hatene nia meta mak ne’ebé, sei ita hotu servisu, ha’u hanoin meta sira ita bele atinje iha 2030, ita planeta ba 50:50 ba igualdade jéneru”, katak tan.
Veneranda apela ba feto sira bainhira iha oportunidade labele ses, tenke ba oin nafatin, orgullu ida mak partisipasaun feto iha vida politika pursentu rua sa’e ba pursentu lima, espera katak tinan 10 mai tan bele sae ba pursentu 10 ou pursentu 20.
Jornalista: Julia Chatarina
Editora: Rita Almeida
