DILI, (TATOLI)—Reprezentante Konsellu Imprensa São Tomé e Princípe, Jesuley Patrick Lopes afirma katak imposível estadu ida demokrátiku bainhira sosiedade la iha meiu sira hodi hato’o sira-nia opiniaun.
Reprezentante nasaun belun Saotomense ne’e, iha salaun Delta Nova bainhira partisipa komemorasaun Konsellu Imprensa Timor-Leste nian ba tinan ida sita filózofu direitu na atualidade, Ronald Dworkin katak direitu fundamentál sira presiza respeita. “Liliu mak protesaun ba dignidade umana”, akresenta.
Bele mós tau iha konsiderasaun katak la iha ema ida mak bele fó poder lialoos nian ho absoluta. Tanba motivu ida ne’e, la iha pensamentu ida mak magnífiku liu ne’ebé la admite kestionamentu.
Sosiologu Karl Max, iha nia defeza ba liberdade espresaun hateten katak: “Liberdade imprensa ne’ebé mós kmanek ida, mezmu la presiza tenke feto”.
“Atu bele kumpri nia funsaun hodi informa, nesesáriu mak imprensa bele konfronta ho opiniaun oioin ne’ebé mak iha”, akresenta.
Kona-ba liberdade imprensa Timor-Leste ne’ebé hetan klasifikasaun iha pozisaun 98 husi nasaun 180, reprezentante São Tome e Principé ne’e haktuir katak sira-nia nasaun inklui mós Cabo Verde hetan klasifikasaun di’ak entermu direitu polítiku, liberdade sivil no liberdade imprensa ne’ebé avalia husi organizaun Freedom House, Norte Amérika nian.
“Atu manten konkista no hadi’a liutan dezenvolvimentu komunikasaun sosiál iha arkipelagu saotomense nian ami hakarak konta nafatin ho apoiu husi Repúblika Timor – Leste”, husu.
Apoiu ne’e mak liuhusi troka regulár informasaun, esperiénsia, promosaun no dezenvolvimentu projetu mútua liliu iha planu estratéjia modernizasaun nian, dezenvolvimentu no promosaun ba komunikasaun sosiál iha nasaun rua.
Jornalista: Rafy Belo
Editora: Rita Almeida
