DILI (TATOLI)—Ekipa jogadór estranjeiru ne´ebé hetan kontratu hosi klubu sira iha Timor, manán ekipa selesaun Nasionál Sub-22 liuhusi jogu amigável ne´ebé hala´o iha Estádiu Munisipál Dili, Tersa lorokraik semana ne´e.
Ekipa jogadór estranjeiru manán selesaun nasionál ho golu 2-1. Golu rua hosi ekipa estranjeiru oferese hosi jogadór ekipa Primeira Divizaun, Karketu Dili FC, Alan Leandro nomós António Vega Ordenes.
Jogu Amigável ne´ebé maka organiza hosi Federasaun Futeból Timor-Leste no LFA ne’e ho intensaun atu koko jogadór ekipa Selesaun Nasionál antes partisipa iha jogu Asian Football Confederation (AFC) nomós Sea Games Malázia.
Jogadór hosi selesaun nasionál rasik maioria domina hosi jogadór hirak ne´ebé maka joga iha klube 8 iha jogu primeira divizaun nomós balun ne´ebé joga ba segunda divizaun.
Hosi ekipa estranjeiru LFA 2017, hili hosi jogadór hirak ne´ebé maka joga iha primeira no segunda divizaun. Úniku golu hosi Selesaun Nasionál Sub-22, hatama hosi avansadu Carsae FC, Henrique Cruz.
(Jornalista: Xisto Freitas, Editór : Manuel Pinto)
