DILI, (TATOLI) – Governu liuhosi reuniaun Konsellu Ministru (KM) aprova proposta dekretu lei kona-ba estabelesimentu norma ho domíniu ba seguransa aviasaun sivíl ne’ebé aprezenta husi Vise-Ministru Dezenvolvimentu ba Transporte no Komunikasaun, Inácio Moreira.
“Konsellu Ministru mós aprova proposta dekretu lei husi Vise Ministru Dezenvolvimentu ba Transporte no Komunikasaun, Inácio Moreira, atu halo estabelesimentu ba norma ho domíniu ba seguraansa aviasaun sivíl hodi nun’e bele proteje avaliasaun sivíl kontra aktus interferénsia ilísita ne’ebé bele kauza seguransa aviasaun sivíl”, tenik Sekretáriu Estadu Konsellu Ministru no Komunikasaun Sosial, Matias Boavida, ba jornalista sira iha Palásiu Governu, ohin.
Hodi dehan tan proposta lejislativa ne’e aprovadu iha KM ho adaptasaun ne’ebé preve atu halo koordenasaun entre autoridade aviasaun sivíl ho entidade responsavel ne’ebé mak halo jestaun ba aeroportu Rejiaun Administrativu Espesiál Oekusi Ambeno (RAEOA) ninian mós.
Antes ne’e, Parlamentu Nasionál ratifika ona konvensaun Aviasaun Sivíl Internasionál ne’ebé asina iha Chicago 7 dezembru 1944.
Nune’e ho Rezolusaun Parlamentu 12/2004 konsidera Timor-Leste plenamente integradu iha komunidade internasionál iha domíniu aviasaun sivíl nian.
Konsidera mós dekretu lei númeru 1/2003, 10 Marsu, ne’ebé aprova lei baze ba aviasaun sivíl iha mós baze konvensaun aviasaun sivíl internasionál, asegura kompatibilidade entre regra ne’ebé adopta iha nível nasionál no direitu internasionál ne’ebé propoen simu iha ordem jurídika nasionál.
Jornalista: Julia Chatarina
Editora: Rita Almeida
