DILI, (TATOLI) – Governu liuhosi Sekretáriu Estadu Arte no Kultura (SEAK), Teófilo Caldas, hateten SEAK sei haree tais ne’ebé Timor-Leste ho Nusa Tenggara Timur (NTT) iha, inklui tais ne’ebé atu lakon, nune’e Timor-Leste bele ba rejistu iha patrimóniu mundiál.
“Ita tenke prienxe rekizitu UNESCO nian, tais ne’ebé maka atu lakon”, Teófilo Caldas ba jornalista sira hafoin hasoru Primeiru Ministru, Taur Matan Ruak, iha Palásiu Governu, ohin.
Tais modelu oinsá maka Timor-Leste ho NTT hadau malu durante ne’e, Teófilo dehan; “ha’u seidauk ko’alia, tanba sei iha faze preparasaun maibé tempu ida sei fó sai ba públiku, enkuantu iha ona desizaun koletiva”.
Tuir Teófilo tais hirak ne’e maka fó prioridade hodi aselera, nune’e SEAK sei konvoka semináriu nasionál atu iha envolvimentu hosi autoridade lokál sira hodi fó ideia, oinsá maka ita lori tais hodi ba rejistu hanesan patrimóniu mundiál.
Nune’e, maka SEAK iha ona faze preparasaun no sei iha faze enkontru interministeriál atu halo selesaun ba tais Timor-Leste nian atu lori ba rejistu hanesan patrimóniu mundiál,
Aléinde tais, SEAK mós iha programa prioridade ba kurtu prazu 2019 nian maka estabelese akademia arte indústria kooperativa kulturál, konstrusaun edifísiu biblioteka nasionál, implementa akordu akademia nian ho lei direitu autór.
Nune’e mós iha 2020, SEAK mós prepara estatutu no viabilidade, liuliu prepara dezeñu atu bele estabelese sentru kulturál iha Baukau, Ermera no Suai.
Jornalista: Zezito Silva
Editora: Rita Almeida
