DILI, 17 setembru 2019 (TATOLI)–Ministériu Reforma Lejizlativa no Asuntu Parlamenteres (MRLAP), ohin, hahú halo sensibilizasaun ba programa reforma administrasaun públika husi tinan 2019 – 2023.
Notisía Relevante : MRLAP Halo Estudu Kle’an Atu Reforma Lei Sira
Programa sensibilizasaun ne’e hahú ho diretór jeraís no nasionaís sira ne’ebé hala’o knar iha administrasaun públiku. Atividade ne’e hala’o iha salaun Ministériu Solidariedade Sosiál no Inkluzaun (MSSI), Caicoli, Dili.
Assessor ba Gabinete Inovasaun no Administrativa (GIA), Fausto Maria Gama, esplika sensibilizasaun ne’e mós oinsá atu identifika sira nia prioridade ba reforma administrasaun públika nian, inklui mós ajénsia autónomu sira hanesan Komisaun Anti Korrupsaun, Komisaun Funsaun publika, Institutu Nasionál sira..
“Ami espera ohin loron no aban, kada ministériu tenke iha ona ezbosu roteiru ba reforma ninian hodi aprezenta, atu bele halo reforma administrasaun públika bele di’ak liu tan,” esplika Fausto Maria Gama.
Nia hatutan, husi enkontru nee mós diretores jeraís sira iha nia komprensaun no hakarak kria grupu traballu ba reforma nian, ministériu ida haruka ninia reprezenta hanesan pontu fokál ba asuntu reforma ninian atu kontribui di’ak liu tan.
Iha biban hanesan, Maria de Jesus nu’udar Sekretaria Ezekutiva Komisaun Funsaun Públika (CFP-sigla portugés) katak assessor MRLAP esplika administrasaun públika direita inklui indireta, maibé CFP seidauk hare didi’ak saida mak presiza reforma. Atu dehan de’it katak, ein-jerál iha ona konseitu ruma hodi reforma lei sira no reforma administrasaun públika.
Jornalista : Domingos Piedade Freitas
Editór : Francisco Simões
