DILI, 18 setembru 2019 (TATOLI)-Prezidente Autoridade Munisípiu Ermera, José Martins dos Santos Soares, hatete, Munisípiu Ermera husu tan adisionál purvolta $600.000,00-resin ba Komisaun Revizaun Orsamentu Polítika (KROP) hodi ezekuta ba planu indemnizasaun ba okupante rai estadu iha área Merkadu Gleno.
Notísia Relevante : Governu Kontrata Kompañia Thailándia-Koreia Halo Estudu Dada Bee Husi Ermera Mai Dili
Tuir planu Autoridade Munisípiu nian ba futuru sei uza rai iha área Merkadu Gleno hodi konstrui ba edifísiu Kamara Munisipál Ermera.
Prezidente Autoridade Munisípiu Ermera, José Martins dos Santos Soares, ba Ajénsia Tatoli, tersa (17/09/2019), iha Ministériu Finansa, Dili, esplika, restu husi osan indemnizasaun sei uza sosa karreta rua, mobiliáriu hanesan kadeira no meza, subsídiu ba xefe suku, konsellu suku no seluk tan.
Ba Programa Dezenvolvimentu Integradu Munisipál (PDIM) iha 2020, munisípiu ne’ebé koñesidu ho produsaun kafé ne’e propoin osan millaun $11 atu implementa projetu 62 hodi kobre ba konstrusaun postu saúde, edifísiu eskola, bee moos, hasa’e produsaun agrikultura liuhosi programa hadi’a kintál kafé no seluk tan.
Ministériu Finansa iha tetu fiskál 2020 oferese millaun $3.28 ba Autoridade Munisípiu Ermera atu ezekuta ba saláriu vensimentu, bens serbisu, transferénsia públika.
Jornalista: Osória Marques
Editór: Francisco Simões
