DILI, 19 setembru 2019 (TATOLI)– Konsellu Imprensa (CI-sigla portugés) kontinua halo sosializasaun ba autoridade seguransa no sivíl kona-ba Lei Komunikasaun Sosiál (KOMSOS).
Iha semana hirak ba kotuk, CI halo ona sosializasaun hanesan iha Munisípiu Lautem ho Viqueque no ba Munisípiu Bobonaro hala’o ohin iha Eskuadra Komandu PNTL Bobonaro.
Komunikadu imprensa ne’ebé Ajénsia TATOLI asesu husi ofisiál mídia CI relata katak, atividade ne’e nu’udar obrigasaun CI nian ne’ebé hatuur ona iha Lei Komunikasaun Sosiál artigu 42, númeru 2 hodi autoriza hamosu dekretu lei númeru 25/2015.
Iha intervensaun abertura, Prezidente CI, Virgílio da Silva Guterres, esplika, objetivu husi sosializasaun ne’e atu bele fahe hanoin balu kona-ba responsabilidade sira CI ho PNTL, tanba dala barak liu hala’o iha serbisu iha baze, jornalista sira ho polísia maka sempre hasoru malu no dala ruma tama iha konflitu.
“Polísia ho Jornalista ne’e, pozisaun rua ne’ebé maka ninia frekuénsia kruza malu iha kampu ne’e kuaze beibeik. Polísia sira atu garante orden públika no jornalista sira nia serbisu mós atu garante informasaun ba públiku,” hateten Virgílio da Silva Guterres.
Komandante PNTL, Munisípiu Bobonaro, Octavio de Sousa Bucar, hato’o agradese ba CI tanba bele fahe ona informasaun ba malu atu labele hamosu dezentendimentu entre PNTL ho Jornalista iha terrenu.
“Ita ho mídia sira maka sempre hasoru malu iha terrenu, ita koñese malu di’ak, entaun ita bele fahe ba malu di’ak liu tan nune’e bainhira ita hala’o serbisu iha terrenu, informasaun ne’e labele falla,” esplika Komandante PNTL Bobonaro.
Partisipa iha atividade sosializasaun ne’e, Komandante PNTL Bobonaro, Prezidente CI, kuadru PNTL Bobonaro, autoridade lokál balun, inklui jornalista RTTL.EP no rádiu komunidade Bobonaro.
Iha atividade sosializasaun ne’e, CI esplika kona-ba Lei KOMSOS, prosedimentu ba direitu hatán no retifikasaun no prinsípiu jerál aplika ba órgaun no meiu komunikasaun sosiál iha formatu eletróniku. Tuir ajenda CI nian kontinua halo sosializasaun iha Munisípiu Covalima no Rejiaun Administrativu Espesiál Oe-Cusse Ambeno (RAEOA).
Jornalista : Domingos Piedade Freitas
Editór : Francisco Simões
