DILI, 19 maiu 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, tersa (19/05/2020) konvoka enkontru ida ho dirijente husi Universidade Públiku no Privada 10-resin hodi halo avaliasaun ba funsionamentu Universidade durante implementasaun estadu emerjénsia ligadu ho COVID-19.
“Ita realiza sorumutu ho Konsellu Reitór sira ne’e atu update progresu saida maka sira halo no dezafiu ne’ebé maka hasoru iha tempu estadu emerjénsia hodi sai referensia ba ha’u para aprezenta filafali ba Konsellu Ministru,” Ministru Longuinhos dos Santos, hafoin ramata enkontru ho Reitór sira iha edifísiu MESSK Colmera Dili, ohin.
Asuntu importante ne’ebé maka parte Governu no universidade toka hanesan updeta filafali kona-ba planu implementasaun internet gratuita ba estudante sira, programa ezame monografia ba estudante finalista no seluktan.\
Iha biban hanesan Reitór Universidade da Paz (UNPAZ), Adolmando Amaral informa enkontru ne’e la halo desizaun ruma tanba Governu hakarak hatene de’it kona-ba funsionamentu universidade sira.
“Ha’u hanoin sorumutu ida ohin ne’e laiha buat foun ida ba ami tanba Ministru hakarak update kona ba progresu aprendijazen programa online ba estaudante sira kada Universidade ne’e, ezame monografia ba obra sientífiku no estájiu ba estudante sira,”katak Adolmando.
Jornalista : Tomé Amado
Editór : Agapito dos Santos
