DILI, 14 setembru 2020 (TATOLI)-Tribunál Distritál Dili (TDD), tersa aban (15/09) sei omóloga manifestante Aliansa Universitáriu Timor-Leste (AUTL) na’in-15 ne’ebé halo manifestasaun hasoru Ministru Ensinu Superior, Longuinhos dos Santos.
Estudante hirak ne’e hetan detensaun kumpre ona oras 72, ne’ebé antes ne’e hetan kapturasaun husi PNTL, iha loron 9 setembru ne’e, tanba halo manifestasaun hasoru Ministru Edukasaun Ensinu Superior tama to’o iha aredór Ministériu Ensinu Superior nian.
“Prosesu ne’e tersa aban (15/09), tuku 16:30 Otl, sei rona desizaun ikus husi Tribunál,” informa Advogadu privadu Marito da Silva ba Agência Tatoli, ohin, iha TDD.
Iha sábadu (12/09) Ministériu Públiku (MP) iha nia alegasaun husu Tribunál atu aplika pena multa ba iha arguidu na’in-15.
Prosesu ne’e, MP akuza arguidu na’in-15 ba krime Dezobediénsia ne’ebé previstu iha artigu 244 husi KP, no lei orgánika númeru 1/2006.
Tuir MP iha alegasaun prosesu sumáriu haree katak pena ne’ebé di’ak liu ba arguidu sira mak pena multa,
Parte defeza ne’ebé fó asisténsia arguidu sira, iha alegasaun husu Tribunál atu aplika pena ne’ebé adekuadu ba iha arguidu sira, no tetu mós ho arguidu sira nia kondisaun hanesan estudante.
Iha julgamentu primeiru interrogatóriu arguidu sira hotu hili sira maioria nia direitu silénsiu, no arguidu ho inisiál FSS maka fó deklarasaun.
FSS deklara , sira halo manifestasaun tanba ministru la responde ejijénsia ne’ebé sira nia parte hato’o relasiona ho rejistrasaun ba eskola. Prosesu sumáriu nee, prezide husi Juiz singular Maria Solana no arguidu sira hetan asisténsia legal Advogadu Privadu Marito da Silva.
MP akuza AUTL na’in-17 ba krime dezobediénsia
Ministériu Públiku mós akuza arguidu na’in-17 seluk hanesan estudante Universitáriu Timor-Lorosa’e, ba krime dezobediénsia ne’ebé previstu iha artigu 244 husi Kódigu Penal, no lei orgánika númeru 1/2006.
Akuzasaun ne’e relasiona ho manifestasaun ne’ebé arguidu sira hala’o kona-ba orsamentu ba rejistrasaun nian, no arguidu sira halo manifestasaun ne’e tanba de’it Ministru Ensinu Superior la responde ezijénsia ne’ebé sira hato’o.
Polísia kaptura arguidu sira iha loron 11 setembru, tinan ne’e, no kumpre ona detensaun oras 72 , no submete mai iha prosesu sumáriu iha Tribunal Distritál Dili iha domingu (13/09).
Tuir ajenda iha loron 18 fulan ne’e iha tuku 17:30 Otl, sei iha kontinuasaun audiénsia julgamentu hodi rona desizaun ikus husi Tribunál.
Jornalista : Nelson de Sousa
Editór : Francisco Simões
