DILI, 25 outubru 2020 (TATOLI)—Reprezentante Sentru Sover Butir Matan, Natalia Fernandez, informa durante ne’e, ninia parte transforma ona lixu ba sasán artezenatu hanesan kopu no vazu ai-funan.
“Ami hanesan uza butir ne’ebé ema hemu tua hotu ona, ami rekolla filafali butir mamuk sira ne’e, ami bele halo produtu hanesan kopu, vazu ai-funan no mós ba buat seluk tan,” nia dehan ba jornalista sira bainhira halo promosaun ba sira-nia produtu artezenatu iha Timor Plaza, sabadu (24/10).
Notísia Relevante :Abertura feira, MTKI planu tinan 2021 realiza kada fulan
Nia dehan sira-nia ekipa kompostu husi ema ho defisiénsia matan, tilun no fiziku seluk maka prodúz sasán artezenatu hirak ne’e ho ekipamentu manuál.
“Ami nia fatin ne’e envolve ema ho defisiénsia no mós la defisiénsia, durante aprende hanesan halo resiklazen ka sasán uzadu sira sai produtu sira kopu, vazu aifunan no sira seluk, ami la haree ema fó oportunidade ba sira sira aprende, hatudu sira mos bele no ohin sira rasik mai aprezenta sira-nia produtu artezenatu iha ne’e,” nia hatutan.
Sentru ne’e foin estabelese iha tinan rua nia laran maibe fó formasaun ba defisiénsia ho gratuita iha área artezenatu.
Husi produtu hirak ne’e sira faan ona iha merkadu ho folin hahú husi $1.00 to’o $15.00
“Durante ne’e ami fó formasaun ba ema defisiénsia no ema la defisiénsia sira ne’ebé maka iha vontade harak aprende, ami ajuda sira karik hakarek le’e no fó formasaun hanesan transfoma resikalazen sai buat seluk, para aban bainrua sira kria servisu ba sira-nia an rasik,” nia hateten.
Notísia Relevante :Grupu Arte Mambae Rai Husar Voluntariamente Halibur Lixu Halo Resiklajen
Jornalista: Natalino Costa
Editór:Agapito dos Santos
