MANUFAHI, 04 dezembru 2020 (TATOLI)—Mane ida ho inisiál PM, tinan 35, husi Postu Administrativu Alas Munisípiu Manufahi, iha kuarta (02/12), mate tanba hemu ai-moruk rega duut ho marka Bassa.
Komandante PNTL Munisípiu Manufahi, Superintendente Joni Viana, informa kazu ne’e akontese hafoin mosu diskusaun no to’o mosu konflitu entre matebian ho nia kaben ho inisiál E. da C. tinan30.
Kazu ne’e akontese iha suku Uma-Berloit, Aldeia Uma-Ferik, iha tuku 08:00 Otl kalan, no iha tuku 10:30 mak hemu ai-moruk no liu de’it minutu 10 matebian la konsege salva.
“Iha loron kuarta (02/12/2020), iha Postu Administrativu Alas mak kazu violénsia doméstika entre fen ho laen diskute malu to’o baku malu, depois laen hakerek hela mensajén katak nia la aguenta ona moris ho nia fen hodi ikus mai nia termina hodi deside hemu ai-moruk rega duut nian to’o hakotu iis,” informa Komandante PNTL ne’e iha ámbitu desiminasaun informasaun husi IPG kona-ba risku dezastre naturál iha Salaun Administrasaun Manufahi, sesta ne’e.
Oras ne’e, Komando PNTL Manufahi lori ona mate-isin bá Ospitál Nasionál Guido Valadares hodi halo prosesu autopsia, enkuantu matebian nia kaben sei hela iha ninia residensia.
Kona-ba situasaun en jerál iha Alas, Superintendente Polisia Joni Viana informa la’o hakmatek no kalma.
Jornalista: Antónia Gusmão
Editór: Agapito dos Santos
