DILI, 15 janeiru 2021 (TATOLI)—Centro de Solidariedade Social do Município de Lautém (CSSML), segunda (11/01/2021), finaliza ona pagamentu ba lista aprovadu reklamante ba apoiu monetáriu uma-kain iha ámbitu Pandemia Covid-19 iha Munisípiu Lautém.
Pagamentu ne’ebé hahú iha 08 janeiru 2021 ne’e, hala’o iha suku sira ne’ebé pertense ba Postu Administrativu Lospalos, mak hanesan Suku Lore 1, Lore 2, Bauro no Raça no hala’o mós iha postu administrativu seluk hanesan Iliomar, Lautém, Luro no Tutuala.
Ba Agência Tatoli iha Dili, ohin, Diretór CSSML, Paulo da Silva Pinto, esplika komposizaun ekipa pagamentu apoiu monetáriu agregadu família ne’e maihosi reprezentante MSSI-CSSML, xefe suku, PAAS, Ofisiál Polísia Suku (OPS) no xefe aldeia.
Paulo hateten pagamentu refere bazeia ba lista editál aprovadu reklamante no iha sentru pagamentu nafatin kumpre rekomendasaun Organizasaun Mundiál Saúde (OMS).
Iha ámbitu responde surtu Covid-19 ne’e, Ministériu Solidariedade Sosiál no Inkluzaun (MSSI) asume responsabilidade ba programa tolu (3) ne’ebé integra iha programa Governu nian hanesan Apoiu Monetáriu ba Agregadu Família, Asisténsia Funerál vitima COVID-19 no subsídiu ba trababalladór sira no motorista transporte públiku.
Hosi programa tolu ne’e, MSSI hahú hala’o ona implementasaun ba programa apoiu monetáriu ba agregadu família ba uma-kain hirak ne’ebé mak hetan ona rejistrasaun to’o loron-8 maiu 2020 hodi responde ba Estadu Emerjénsia.
Pagamentu reklamasaun ba faze datoluk nian, hanesan programa kontinuasaun bázika kada uma-kain ne’ebé afeta direta durante tempu Estadu emerjénsia.
Jornalista: Evaristo Soares Martins
Editór: Xisto Freitas
