ERMERA, 27 fevereiru 2021 (TATOLI)-Xefe Suku Goulolo, João de Deus, rejista ona uma abitante nain tolu hosi uma-kain tolu ne’ebé sira-nia kondisaun moris vulneravel tebes atu hetan uma kbiit-laek.
Suku Goulolo, pertense área jurisdisaun ba Postu Administrativu Letefoho, Munisípiu Ermera, ne’ebé maioria abitante nu’udar agrikultura (kafé na’in).
Notísia Relevante : Uma-kain 110 iha suku Goulolo seidauk asesu eletrisidade
“Agora ha’u verifika hotu ona, hatama hotu ona ba iha Ministériu Administrasaun Estatál (MAE). Ami haree uma-kain tolu ne’e merese atu hetan apoiu sosiál hosi Governu,” João de Deus, informa ba Agência Tatoli iha suku Goulolo, sesta (26/2).
Nia husu ba Governu atu bele karik halo uma ba kbiit-laek la bele termina suku ida másimu uma-kain tolu de’it, maibé bele karik depende ba realidade moris povu nian. Atu nune’e, la bele hamosu diskriminasaun iha suku-laran.
Husu destaka tan pesoál saúde
Xefe Suku Goulolo João de Deus, husu mós ba Ministériu Saude atu destaka tan pesoál saúde iha postu saúde ne’ebé lokaliza iha Suku Goulolo tanba daudaun ne’e iha pesoál saúde na’in-ida de’it.
“Daudaun ne’e iha pesoál saúde ida de’it ne’ebé tenke atende komunidade uain hosi aldeia haat ne’ebé pertense ba suku Goulolo. Tanba ne’e mak ami husu aumenta tan pesoál saúde,” João de Deus hateten.
Autoridade Suku Goulolo ne’e hateten, nia komunidade koopera tebetebes ho parte saúde tanba ho voluntáriamente hadi’a postu saúde iha Suku Goulolo.
“Ami ho voluntária, hadi’a tiha kondisaun postu saude, tanba ne’e karik bele Ministériu Saúde koloka pesoál saúde atu bele fó asisténsia ida efisiénsia no efikás ba komunidade nia espetativa iha atendimentu saúde,” nia tenik.
Notísia Relevante : Kondisaun estrada ligasaun suku Goulolo bá Ermera ladún di’ak
Jornalista : Natalino Costa
Editór : Francisco Simões
