DILI, 09 marsu (TATOLI)—Hospitál Nasionál Guido Valadares (HNGV) suspeita hela pasiente na’in-10, tanba iha síntoma COVID-19 hanesan isin manas, mear no inus-been.
Xefi Gabinete Kualidade no Komunikasaun Sosiál, HNGV, Sara Maria Xavier, esplika haree ba númeru kazu pozitivu COVID-19 ne’ebé aumenta, parte Ospitál re-ativa fila-fali triazen iha loron 26 fevereiru to’o agora iha pasiente hamutuk 2.964, no na’in 10 mak suspeita.
Notísia Relevante:COVID-19: pozitivu 13, baixa aumenta ba 48
“Ema na’in-10 ne’e iha hela izolamentu retensaun temporária HNGV tanba haree ba kazu-sira hodi hein Laboratóriu Nasionál Saúde no vizilánsia-sira hodi halo swab,’’ Sara Maria Xavier ko’alia ba jornalista-sira iha HNGV, tersa ne’e.
Nia dehan, suspeitu na’in-10 ne’e adultu hotu ho síntoma ne’ebé mensiona no tenki tau sira iha izolamentu temporária HNGV.
Kona-bá kapasidade retensaun temporária, nia dehan, kama rua mak iha laran maibé iha tempu tuir-mai sei aumenta tan kama atu nune’e bele responde hotu ba suspeitu hosi triazen sira ne’ebé mai iha HNGV.
Sara Maria Xavier husu ba vizitór-sira ne’ebé mai iha HNGV atu kumpri nafatin medida preventiva hosi Ministériu Saúde hanesan uza máskara, fase liman no mantein distansiamentu fíziku.
Alende ne’e, husu mós atu redúz númeru vizitór, pasiente ida família ida mak hein tanba oras ne’e daudaun númeru pozitivu COVID-19 aumenta ba beibeik.
Notísia Relevante:TL seidauk iha kazu pozitivu COVID-19 moderadu-grave
Jornalista: Felicidade Ximenes
Editór: Cipriano Colo
