DILI, 12 abril 2021 (TATOLI)—Vitima dezastre naturál uma-kain 23 hosi Aldeia 17 de Abril, Suku Metiaut, Postu Administrativu Cristo Rei, Munisípiu Dili, husu Governu atu fó apoiu materiál konstrusaun uma nian ba sira atu hadi’a hikas sira-nia uma.
Reprezentante vítima, Emília do Rosário Pereira hateten, sira presiza tebes apoiu meteriál konstrusaun nian tanba daudaun ne’e sira-nia uma kuaze estraga totál tanba hetan estragu hosi dezastre naturál ne’ebé akontese iha domingu (04/04) foin lalais ne’e.
“Ami husu ba Governu karik bele ajuda lalais apoiu materiál konstruasaun uma nian mai ami, tanba udan boot ne’ebé foin lalais akontese ne’e halo rai monu taka tiha ami-nia uma to’o agora ami hela iha viziñu sira-nia uma,” Emilília do Rosário Pereira hateten ba Agência TATOLI iha Aldeia 17 Abril Metiaut, Dili, segunda ne’e.
Desde akontese dezastre naturál ne’ebé hamosu inundasaun iha Kapitál Dili, nia dehan, to’o mai agora vítima sira seidauk bele hela sira-nia uma tanba sei iha situasaun traumatizadu.
“Semana ida resin ona ami hela iha viziñu sira-nia uma. Ami-nia uma, ami hanesan bainaka fali tanba loron mak ami mai vizita de’it no kalan ba toba viziñu sira-nia uma. Ida-ne’e halo ami triste tebes. Tanba ne’e, Governu presiza tau matan lalais ba problema hirak ne’e,” nia dehan.
Nia argumenta, hosi loron akontesimentu to’o ohin loron, sira foin hetan apoiu nesesidade báziku uitoan hosi Ministériu Solidaridade Sosiál no Inkluzsaun (MSSI) ne’ebé servisu hamutuk ho Cruz Vermelha Timor-Leste (CVTL) fahe foos saka rua, mie sedaa, falun neen no ikan lata neen.
“Vítima sira seluk simu lona, biti, manta no seluk tán to’o agora ami seidauk simu. Maske ami maluk hosi aldeia sira seluk hetan ona maibé ami seidauk. Maibé, ami mós komprende situasaun ne’e. Espera katak loron tuir mai, ita-nia Governu bele ajuda ami saida mak ami presiza,” nia hateten.
Vítima seluk, Floriana Bakita Soares hateten, sira presiza tebes apoiu materiál konstrusaun uma nian hanesan sementu, besi no kalen tanba inundasaun ne’ebé foin lalais akontese ne’e rai monu taka sira-nia uma.
“Ami la husu buat barak. Ami husu de’it karik bele tau matan lalais ami-nia situasaun no kondiasaun sira-ne’e, tanba ami hela iha foho lolon tán mak Governu la tau matan lalais, udan tau bosok de’it ami-nia uma sira ne’e bele monu hotu, tanba agora uma tara-aan de’it ne’e,” nia dehan.
Aleinde presiza konstrusaun materiál uma nian, nia hatutan, sira presiza tebes mós bee-moos tanba tinan barak ona sira la asesu bee-moos. La’ós tanba dezastre naturál akontese mak bee laiha maibé uluk kedas tanba ami hela iha rai lolon ne’e kuru bee tenke tuun fali ba rai tetuk sira mak hetan hetan bee.
“Dalan ba ami ne’e di’ak loos maibé bee-moos mak laiha. Tanba ne’e karik bele Governu bele tau matan mós ba ami-nia problema ne’e,” nia hateten.
Entretantu iha observasaun Agência TATOLI iha terenu nota katak komunidade hosi Aldeia 17 Abril, balu ne’ebé hela iha rai lolon, daudaun ne’e sira sosa rasik lona hodi taka ba rai nune’e udan tun karik, udan been labele kona-rai tanba komunidade sira-nia uma ne’ebé harii iha rai lolon ne’e aat hotu.
Jornalista: Arminda Fonseca
Editór: Cancio Ximenes
