DILI, 07 maiu 2021 (TATOLI)—Sekretária Estadu Protesaun Sivíl (SEPS) kontinua buka-tuir mate-isin na’in-sia (9), ne’ebé lakon durante inundasaun iha 04 abríl.
SEPS, Joaquim Gusmão, hateten hafoin verifika dadus provizóriu, to’o 04 maiu númeru serteza, ho inundasaun ne’ebé akontese iha territóriu hamate ema 41 no na’in 32 mak hetan ona, na’in-sia (9) mak seidauk hetan, hosi Munisípiu Manatuto no Dili ne’ebé rai hanehan no mota lori.
Notísia relevante:SEPS koordena ho polísia marítima buka mate-isin 10
SEPS rasik koordena ona ho Unidade Polísia Marítima (UPM) atu bainhira halo patrullamentu iha tasi, bele buka-tuir, tanba iha mate-isin balun mota lori.
“To’o agora seidauk hetan mate-isin sira ne’e. Tanba ne’e, ita koordena nafatin ho UPM atu ajuda hodi buka-tuir,” Joaquim Gusmão hateten ba jornalista Agência Tatoli, iha edifisiu SEPS, Caicoli, sesta ne’e.
Governante ne’e husu família vítima atu simu kondisaun ida-ne’e, tanba difísil atu hetan, maibé SEPS esforsu nafatin.
Jornalista: Nelson de Sousa
Editór: Cipriano Colo
