iklan

EKONOMIA, HEADLINE

01 juñu, BCTL hahú prosesu inskrisaun programa Moratóriu Kréditu

01 juñu, BCTL hahú prosesu inskrisaun programa Moratóriu Kréditu

Ilustrasaun moratóriu kréditu. Imajen/Espesiál

DILI, 31 maiu 2021 (TATOLI)–Banku Sentrál Timor-Leste (BCTL, sigla portugés) ofisialmente anunsia, hahú aban loke inskrisaun ba programa Moratóriu Kréditu.

“Banku Sentrál Timor-Leste hakarak informa ba públiku katak hahú 01 juñu, prosesu inskrisaun ba partisipasaun iha programa Moratóriu Kréditu loke ona ba mutuáriu sira ne’ebé iha kréditu iha banku komersiál no instituisaun depozitária la’ós banku sira,” refere nota ne’ebé Agência TATOLI asesu, segunda ne’e.

Prosesu inskrisaun sei taka iha loron 25 juñu 2021 no sei laiha estensaun ba atividade inskrisaun.

“Mutuária sira ne’ebé iha interese atu partisipa iha programa moratóriu kréditu bele foti formuláriu inskrisaun iha edifísiu banku ida-idak nian ka bele mós asesu  formuláriu hosi banku sira nian iha portál Banku Sentrál,” nota subliña.

Programa moratóriu kréditu nu’udar programa públiku, ne’ebé introdús liuhosi lei númeru 8/2021, loron 03 maiu, ne’ebé sofre alterasaun dahuluk ba Lei númeru 14/2020, loron  29 dezembru, Orsamentu Jerál Estadu (OJE) 2021, ne’ebé aprovasaun medida ba apoiu sosiu-ekonómiku.

Programa ida-ne’e, ho ninia durasaun hamutuk fulan-sia, konta hosi loron 01 juñu 2021 to’o iha loron 31 marsu 2022.

Aprovasaun Orsamentu Retifikativu, halo mós mudansa ba dotasaun Fundu COVID-19, ne’ebé ho montante inisiál $31.000.000 hetan ona reforsu $256.641.793, nune’e ninia totál hamutuk $287.641.793.

Nune’e, fó biban ba Governu hodi finansia medida sosio-ekonómiku hanesan apoiu ba empregu millaun $45,3, moratória kréditu millaun $2, izensaun pagamentu propina ba estudante ensinu superiór millaun $14, subsídiu internet ba estudante ensinu superiór millaun $2,2, sosa produtu alimentár hosi produtór lokál millaun $12.

Nune’e mós, subsídiu ba eletrisidade, finansia operasaun Sala Situasaun, Sentru Integradu Jestaun Krize (CIGC, sigla portugés) millaun $16,7, finansia suplementu remuneratóriu ba traballadór liña frente millaun $51,9, no konklui pagamentu ba programa Cesta Bázika millaun $31.

Jornalista: Antónia Gusmão

Editora: Julia Chatarina

iklan
iklan

Leave a Reply

iklan
error: Content is protected !!