BOBONARO, 07 juñu 2021 (TATOLI)—Autoridade munisípiu Bobonaro ezekuta ona Orsamentu Jerál Estadu (OJE) tinan 2021, hamutuk $1.383.350,77 ho-nia persentajen 27.65%.
“Pursentu ne’e kategoria saláriu no vensimentu, bens no serbisu inklui tranferénsia públika, iha relatóriu 1 juñu,” Prezidente Autoridade Munisípiu Bobonaro, Jeferino Saores dos Santos, hateten ba jornalista Agência Tatoli, iha edifísiu Administrasaun, Holsa, Maliana, segunda ne’e.
Notísia relevante:Ezekusaun OJE 2021 atinje ona 25%
Jeferino Saores dos Santos, esplika tinan ne’e munisípiu Bobonaro sei ezekuta de’it 40% tanba Governu sentrál hasai ona 60% hodi finansia atividade rekoperasaun kalamidade no fó apoiu ba programa prevensaun surtu COVID-19.
“Orsamentu 60% ne’ebé Governu sentrál hasai, maihosi kapitál dezembolvimentu,” nia subliña.
Osan restu hosi kapitál dezenvolvimentu sei iha rihun $219.450 ne’ebé tuir planu sei ezekuta ba dezenvolvimentu infraestrutura, no oras-nee iha hela faze konkursu públiku.
Relatóriu 1 juñu 2021, taxa ezekusaun bazeia ba kategoria orsamentu munisípiu Bobonaro, saláriu no vensimentu, ezekuta ona $468.282,52, bens no serbisu $197.827,75, tranferénsia públika $717.240,50 ho totál $1.383.350,77 no kapitál menór ho kapitál dezenvolvimentu seidauk ezekuta.
OJE 2021 ne’ebé Governu prevee ba munisípiu Bobonaro, hamutuk $5.002.757 ho kategoria saláriu no vensimentu $1.425.504, bens no serbisu $889.680, kapitál menór $158.115, kapitál dezenvolvimentu $219.450 no transferénsia públika $2.309.826.
Jornalista: Sérgio da Cruz
Editór: Cipriano Colo
