COVALIMA, 25 juñu 2021 (TATOLI) –Komandante Polisia Munisípiu Covalima Superintendente, António Maria de Sá, apela ba komunidade iha Munisípiu Covalima atu hapara ona tesi ai-kameli ilegál no fa’an ilegál ba nasaun viziñu.
Foin lalais, PNTL Covalima halo kaptasaun ba autór balun ne’ebé envolve iha negósiu ai-kameli ilegál no prosesu ne’e nia andamentu iha ona Tribunal. Enkuantu autór sira iha ona prizaun preventiva.
“Ita nia riku soin hanesan ai-kameli iha Munisípiu Covalima lakon barak, tanba ne’e foin lalais ami kaptura autór ne’ebé taa ai-kameli no agora aplika ona prizaun preventiva,” Superintendente, António Maria de Sá informa ba Tatoli iha Covalima, sesta ne’e.
Ai kameli hanesan identidade Timor nian, tanba ne’e sidadaun sira la bele fa’an ilegál no bainhira sidadaun sira fa’an ilegál sei atua tuir lei.
“Administradór no Autoridade lokál tenke servisu hamutuk ho ita nia Ofisiál Polísia Suku (OPS) sira hodi tau matan ba ita nia rikusoin,” António de Sá tenik.
Jornalista : Celestina Teles
Editór : Francisco Simões
