DILI, 30 juñu 2021 (TATOLI)–Governu liuhosi reuniaun Konsellu Ministru (KM) mantein imposizasaun Serka Sanitária iha munisípiu Dili no Baucau to’o finál períodu Estadu Emerjénsia ba dala-XIV.
Desizaun ne’e Governu hasai hafoin halo análiza aprezentasaun hosi husi Sala Situasaun, Sentru Integradu Jestaun Krize (CIGC, sigla portugés) kona-ba pontu situasaun epidemiolójika iha munisípiu rua ne’e.
“Hafoin analiza Konsellu Ministru delibera aprova Projetu Rezolusaun Governu ne’ebé mantein impozisaun Serka Sanitária iha munisípiu Baucau no Dili, to’o finál vijénsia períodu Estadu Emerjénsia to’o tuku 23:59 loron 01 jullu 2021,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu estraórdinaria, iha Palásiu Governu, kuarta ne’e.
Notísia relevante: Prezidente Repúblika dekreta Estadu Emerjénsia ba dala-XIV
Portavóz Governu ne’e informa, aban (01/07) iha sorumutuk ordinária KM maka sei analiza filafali posibilidade kontinuidade impozisaun Serka Sanitária iha munisípiu rua ne’e.
Ho impoziasaun serka sanitária ne’e, bandu nafatin sirkulasaun ema sira-nian entre munisípiu Baucau no Dili no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku ka razaun seluk ne’ebé presiza atu hala’o ba interese públiku.
Notísia relevante: Governu mantein Serka Sanitária iha Baucau-Dili no hakotu Bobonaro-Covalima
“Sidadaun ne’ebé komprova vasinasaun kompleta doze daruak kontra COVID-19 la inklui iha proibisaun ida-ne’e, inklui labarik ho idade tinan 6 mai kraik ne’ebe akompaña,” governante ne’e esplika.
Jornalista : Antónia Gusmão
Editora : Julia Chatarina
