BAUCAU, 06 jullu 2021 (TATOLI)–Diretora Programa Nasionál Dezenvolvementu Suku (PNDS) munisípiu Baucau, Amélia Maria Viegas, hateten, daudaun presiza rekursu umanu hodi hakma’an volume serbisu no projetu ne’ebé aumenta ba bebeik atu ajuda administra projetu sira iha suku.
“Serbisu boot loos maibé ami sei menus rekursu umanu, tanba ne’e espera iha fulan ne’e nia laran iha ema foun atu ajuda ami-nia traballu,” Diretora PNDS Baucau, informa ba Agência TATOLI, iha ninia knaar fatin, admistrasaun munisípiu, Villa nova, tersa ne’e.
Ba kestaun ne’e, Ministériu Admistrasaun Estatál (MAE) iha hanoin aumenta rekursu umanu ne’ebé iha ona prosesu rekrutamentu no treinamentu, ne’ebé hein atu rona rezultadu finál hamutuk ema 21.
Bainhira prosesu kandidatu finaliza ona, tuir planu sei destaka ba kada postu hamutuk na’in-tolu, ba tarefa serbisu fasilitadór, finansa no sosiál.
“Tuir ona formasaun durante fulan-ida resin no hein hela anunsia finál atu sira mai hamutuk iha PNDS Baucau,” nia akresenta.
PNDS rasik daudaun ne’e implementa projeitu programa regular no Uma Kbiit Laek iha postu Vemasse, Venilale no Baguia, enkuantu postu Quelicai, Laga no Baucau villa implementa projetu tolu hanesan reabilitasaun sede suku, PNDS regulár no Uma Kbiit Laek.
Entretantu daudaun ne’e totál funsionáriu PNDS iha munisípiu Baucau hamutuk 38.
Jornalista : Natalino Belo
Editora : Julia Chatarina
