OÉ-CUSSE, 16 Jullu 2021 (TATOLI)—Ekipa Programa Nasionál Dezenvolvimentu Suku (PNDS) RAEOA, sesta ne’e halo sensibilizasaun matadalan ba implementasaun programa Uma Kbi’it Laek ba benefisiáriu sira liu-liu ba aldeia alvu 18 ho ema kbi’it laek 36 mak sai benefisiáriu ba programe refere.
Notísia Relevante: Ekipa PNDS sei halo sensibilizasaun programa “Uma Kbiit Laek” iha RAEOA
“Ha’u husu ba autoridade lokál sira atu servisu hamutuk ho komunidade iha baze atu servisu hamutuk ho ekipa PNDS no seguransa sira iha suku, atu bele implementa programa Uma Kbiit Laek ne’e la’o ho susesu ba territóriu Oé-Cusse tomak. Kada aldeia ida sei hetan uma rua entaun totál Uma Kbiit Laek iha Oé-Cusse ne’e hamutuk 36,” Sekretáriu Rejionál Asuntu Administrasaun, Martinho Abani Elo, hateten iha sensibilizasaun programa Uma Kbiit Laek ne’ebé hala’o iha edifísiu PNDS Palaban, suku Costa, sub-rejiaun Pante Makasar.
Reprezentante Prezidente Autoridade RAEOA ne’e husu ba lideransa komunitária no jestór sub-rejiaun sira atu informa no esplika rezulatdu sensibilizasaun ne’e ba komunidade iha baze.
Governu implementa programa ne’e laiha diskriminasaun no laiha kór polítika tanba programa ne’e trasa hosi VIII Guvernu Konstitusionál atu apoiu uma ba ema kbiit la’ek sira iha territóriu Timor-Leste inklui RAEOA.
Entretantu Diretór Programa Nasionál Dezenvolvimentu Suku, Sebastião Tanesi, hateten programa Uma Kbiit Laek implementa iha Oé-Cusse ne’e lista aldeia alvu sira aprova kedas hosi nasionál, nune’e autoridade RAEOA hein implementa de’it
“Iha RAEOA suku 18 no aldeia 18 mak sai alvu ba programa Uma Kbiit Laek ne’e tanba programa ne’e sub-atividade hosi PNDS ninian. Lista ba aldeia alvu ne’e hetan aprovasaun kedas hosi Nasionál la’ós iha rejionál. Programa ne’e sei kontinua la’o nafatin entaun tinan seluk aldeia seluk mak sai fali alvu ba programa ne’e,” nia hateten.
Notísia Relevante: Trimestre dahuluk, MAE konstrui “Uma Kbiit Laek” ba ema kbiit laek
Tuir planu, iha 20 jullu ne’e, ekipa tolu sei dezloka ba aldeia alvu sira iha sub-rejiaun haat (4) atu halo identifikasaun lista ba suku no aldeia benefisiáriu, no dadús identifikasaun no sensibilizasaun iha nivel aldeia alvu sira-ne’e sei konklui iha 25 jullu ne’e.
Kritéria ba identifikasaun mak sei envolve servisu Operasaun Polisia Suku (OPS), xefe suku no aldeia alvu, reprezentante veteranu no reprezentante juventude, nune’e sira sai ekipa ida atu verifika ema kbi’it la’ek sira-ne’ebé merese atu hetan apoiu ne’e.
Diretór PNDS ne’e seidauk informa totál orsamentu tanba tipu implementasaun Uma Kbiit Laek ne’e konforme medida uma nian. Tanba tuir trajetu Guvernu nian katak kada uma ida sei konstrui hahú hosi rihun $14 mil to’o $17, nune’e iha rezultadu ikus mak sei anunsia sai ba públiku
Entretantu totál aldeia ne’ebé mak sai alvu iha programa Uma Kbiit Laek ne’e mak hanesan aldeia 18 iha suku 18 nia laran, no kada aldeia ida (1) sei hetan uma kbiit laek rua (2) mak hanesan:
- Iha sub-rejiaun Pante Makasar ne’e suku Costa iha ldeia Oétfo, suku Nipani iha aldeia Sakato, Suku Bobokase iha aldeia Fatubijae, suku Lalisuk iha aldeia Banoco, suku Cunha iha aldeia Noeninen, suku Lifau iha aldeia Tula-Ika, suku Taiboko iha aldeia Hau-Boni, suku Naimeco iha Aldeia Baqui.
- Iha sub-rejiaun Oésilo, suku Bobometo iha aldeia Saben, suku Usitasae iha Aldeia Sifin, suku Usitaqueno iha aldeia Nibin.
- Iha sub-rejiaun Pasabe, suku Abani iha aldeia Pasabe, suku Malelat iha aldeia Malelat.
- Iha sub-rejiaun Nitibe, suku Ban-Afi iha aldeia Neofmetan, suku Lela-Ufe iha aldeia Bebo, suku Usitaco iha aldeia Kuantua, suku Bene-Ufe iha aldeia Manan, suku Suni-Ufe iha aldeia Oélnano’e
Entretantu totál aldeia suku iha Rejiaun Administrativa Espesiál Oé-Cusse Ambeno hamutuk 18 ho totál aldeia hamutuk 63 ne’ebé parténsia ba sub-rejiaun Nitibe, Oésilo, Passabe no sub-rejiaun Pante Makasar.
Iha tinan fiskál 2021, Governu harii uma kbiit-laek hamutuk unidade 1.254 iha suku 424 ho totál orsamentu $25.000.000 ho kustu ba kada uma purvolta $14.000 to’o $17.000.
Uma Kbiit Laek ne’ebé atu konstrui kompostu hosi tipu ka modelu rua mak tipu 48 m2 ne’ebé sei inklui kuartu tolu, sala vizita ida no dapur ida no tipu 37 m2 ne’ebé sei inklui kuartu rua, sala vizita ida no dapur ida.
Notísia Relevante: Governu hahú ona konstrui “Uma Kbiit Laek” 1.254 iha territóriu nasionál
Jornalista : Abilio Elo Nini
Editór : Cancio Ximenes
