DILI, 29 jullu 2021 (TATOLI)—Membru Polísia Nasionál Timor-Leste (PNTL) iha territóriu tomak na’in 3.510, simu ona vasina COVID-19 doze dahuluk no daruak.
“Totál membru iha territóriu tomak hamutuk 4.014, sira ne’ebé simu ona vasina na’in 3.510 no seidauk simu vasina na’in 504,” Portavós Komandu Jerál PNTL, Superintendente Xefe, Arnaldo de Araújo, hateten ba jornalista-sira, liuhosi konferénsia imprensa iha komandu jerál PNTL, Caicoli, kinta ne’e.
Notísia relevante:Kobertura vasina kontra COVID-19 lidera hosi munisípiu tolu
Arnaldo de Araújo, hatutan menbru-sira ne’ebé seidauk simu vasina tanba ho kondisaun moras komplikadu hanesan diabetes, tensaun no stroke.
Totál doze vasina ne’ebé fó ona ba populasaun elijível hosi idade 18 ba leten, to’o 28 jullu, dadér tuku 10:00, bazeia ba informasaun sistema saúde iha Ministériu Saúde, totál kumulativu doze dahuluk iha Dili 133.016 (62,2%) no totál kumulativu doze daruak iha Dili 75.889 (35,50%).
Ema ne’ebé simu ona vasina doze dahuluk iha Timor-Leste 277.953 (36,8%) no simu ona doze daruak 89.286(11,83%).
Jornalista: Nelson de Sousa
Editór: Cipriano Colo
