DILI, 10 agostu 2021 (TATOLI)—Primeiru-Ministru (PM), Taur Matan Ruak, orienta parte kompetente atu halo investigasaun ba kazu vasina AstraZeneca aat tanba rai iha konjeladór ho temperatura aas liu ho grau 10, iha Hospitál Nacional Guido Valadares (HNGV).
“Primeiru-Ministru halo ona despaixu iha loron 06 agostu, ne’ebé fó orientasaun ba Inspesaun Jerál Estadu no Organizasaun Mundiál Saúde (OMS) atu halo auditóriu no investigasaun kle’an atu hatene tanba sa mak kazu ne’e akontese,” Ministru Prezidénsia Konsellu Ministeru, Fidelis Manuel Leite Mangalhães, hateten, hodi responde ba preokupasaun Deputadu Bankada sira iha debate votu konfirmasaun ba deklarasaun Estadu Emerjénsia, iha sala plenária Parlamentu Nasionál (PN), tersa ne’e.
Nune’e, daudaun parte rua ne’e halo hela serbisu investigasaun, hafoin iha rezultadu mak bele informa ba PN no públiku.
Iha sorin seluk, Ministra Saúde, Odete Maria Freitas Belo, rekoñese vasina AstraZeneca balun aat.
“Loos duni vasina AstraZeneca ne’e aat bainhira ita hetan inundasaun tanba vasina ne’e tau iha Ospitál Nasionál, ne’ebé tékniku informa parte eletrisidade mak ladún estável,” nia akresenta.
Nune’e, Governu konsulta ona ho Organizasaun Saúde Mundiál no empreza ne’ebé prodúz vasina AstraZeneca, maibé laiha métodu ida atu halo teste vasina di’ak ka la’e, maibé deklara de’it katak bainhira vasina ida iha konjeladór mak aat, maka vasina hotu iha laran aat.
“Ita akompaña ema lubuk ida mak simu ona vasina ne’ebé konjeladu, maibé laiha efeitu ruma ba sira-nia isin, ninia efikásia maka laiha tanba konjela ona. Tanba ne’e, OMS husu atu komunika fali ba ema sira ne’ebé simu ona vasina konjeladu atu bele hetan fali sira-nia doze tuirmai,” Ministra informa.
Tuir Governante ne’e, bele halo teste imunidade ba ema sira ne’ebé simu ona vasina ne’ebé konsidera aat no bainhira iha imunidade di’ak, la presiza halo administrasaun seluk ba sira.
“Ita sira ne’ebé simu ona vasina AstraZeneca, iha posibilidade atu hetan fali vasina booster ba datoluk, ne’ebé ita bele uza sai dalan ida ikus atu la presiza administra fali vasina AstraZeneca maibé ita hein vasina booster. Maibé, tanba vasina aat, hakarak ka lakohi pesoál ne’ebé responsabiliza ba jestaun armajenamentu iha obrigasaun atu hatán,” nia subliña.
To’o loron 09 agostu, totál doze vasina ne’ebé fó ba ema ho idade 18 ba leten iha territóriu tomak hamutuk 429.983, kompostu hosi 317.936 (42,1%) simu ona doze dahuluk no 111.047 (14,7%) simu ona doze daruak.
Vasina ho tipu AtraZeneca hamutuk 370.370 no vasina ho tipu Sinovac hamutu 58.613, ho totál hamutuk 429.983.
Jornalista : Florêncio Miranda Ximenes
Editora : Julia Chatarina
