DILI, 17 agostu 2021 (TATOLI)-Komisaun Anti-Korrupsaun (CAC, sigla portugés), tersa ne’e, ezekuta mandadu buska no detensaun ba emprezáriu na’in-haat ne’ebé sai suspeitu ba kazu fraude fiskál (la selu taxa ba Estadu).
Suspeitu na’in-haat ne’e; feto rua no mane rua, ho inisiál RH, NS, GMBC, AK, detein ona iha Sela CAC nian iha Faról, Dili, tanba deskonfia komete kazu fraude fiskál previstu iha artigu 314 iha kódigu penal Timor-Leste.
CAC ezekuta mandadu buska domisiliáriu apreensaun no mandadu detensaun ho númeru Nuc 0024/21.PGGCC hosi Tribunál Distritál Dili (TDD), ne’ebé suspeitu sira suspeita ho krime fraude fiskál deskonfia hala’o atividade ekonómika liu sira-nia kompañia rua hodi importa karreta, motór, ekipamentu médiku no ai-moruk mai TL no fornesimentu (supply) iha rai laran, maibé dezde 2012 to’o agora la selu taxa ba Estadu ho valór prezuiju $200.000,00-resin.
Ekipa investigadór CAC hala’o buska ba iha rezidénsia suspeitu sira-nian iha Bairru-Pité inklui iha edifísiu kompañia ne’e nian iha área Fatuhada, Dili.
Diretór Investigasaun CAC, Emilio Quintas, hateten durante iha terrenu ekipa CAC rekolla ona dokumentu lubuk hanesan atividade lisensa kompañia nian no dokumentu relasaun ho projetu kompañia rua ne’e nian hatudu manan konkursu públiku lubun iha Ministériu Saúde.
“Ami sei aprezenta ba primeiru interrogatóriu iha Tribunál,” Emilio Quintas hateten ba jornalista sira hafoin halo apreensaun no detensaun ba suspeitu sira.
CAC lori suspeitu sira nu’udar diretór no superiór iha kompañia rua ne’e detein iha sela CAC durante oras 72 hodi aprezenta primeiru interrogatóriu iha Tribunál primeira instánsia.
Tuir observasaun Agência Tatoli iha terrenu hatudu katak, iha operasaun CAC ne’e akompaña hosi Polísia Nasionál Sientífika Investigasaun Kriminál (PNSIK).
Jornalista : Nelson de Sousa
Editór : Francisco Simões
