DILI, 02 setembru 2021 (TATOLI)—Xefe Kaza Sivil Prezidénsia Repúblika, Francisco Maria Vasconcelos, lakon inan Ana Maria Fernandes de Vasconcelos, ne’ebé hakotu iis ho idade 107, iha Hospital Nacional Guido Valadares (HNGV) iha kuarta (01/09) kalan.
Ho nune’e, Prezidente Repúblika (PR), Francisco Guterres ‘Lú Olo no funsionáriu tomak hato’o sentimentu triste ba família.
“Prezidente Repúblika hato’o sentidu kondolénsia ba Xefe Kaza Sivil, Francisco Maria Vasconcelos no família ne’ebé lakon inan doben, guerilleira no edukadora ne’ebé hakotu iis iha loron 01 setembru 2021 iha Hospital Nasionál,” Xefe Estadu hato’o mensajen liuhosi nota ne’ebé Agência TATOLI asesu, kinta ne’e.
Notísia relevante: Espoza Xefe Kaza Sivíl PR kontribui ba luta libertasaun nasionál
Antes ne’e, iha loron kuarta (25/08) madrugada, Xefe Kaza Sivil Prezidénsia Repúblika, lakon nia espoza Eugenie Tatulese ne’ebé hakotu ona iis iha Indonézia.
Biografia Saudoza Ana Maria Fernandes de Vasconcelos
Ana Maria Fernandes de Vasconcelos moris iha postu Uatucarbau, munisípiu Viqueque iha loron 15 abríl 1914.
Oan segundu hosi maun alin na’in-tolu ne’e la eskola, maibé esforsu-an atu hatene no aprende, ikus mai nia bele lee hanesan ema ne’ebé liuhosi edukasaun formál no nia tempu kiik no foin sa’e iha iha de’it Uatocarbau.
Iha tinan 1949 husik hela nia moris fatin no mai Dili, ne’ebé altura ne’ebá ninia idade tama ona tinan 35 no klosan hela. No ikus mai iha Dili, nia domin monu ba mane klosan ida ho naran Vicente de Vasconcelos.
Iha tinan 1963, Avo Ana (naran estimadu) foti desizaun atu forma uma-kain ho Vicente de Vasconcelos, ne’ebé hanesan Pastór, no ikus mai iha oan lima: Maria Filomena de Vasconcelos, Joana Maria de Vasconcelos, Fransisco Maria de Vasconcelos, Abraão de Vasconcelos no Maria da Graça de Vasconcelos.
Ana Maria Fernandes de Vasconcelos ninia tempu tomak uza hotu ba atendimentu ema moras, inan isin-rua, no ema ne’ebé hetan moras oi-oin.
Nune’e, atu halo atendimentu ba ema sira ne’ebé moras, nia harii uma ida espesiál hodi hala’o atividade no dalaruma nia la toba tanba ninia tempu tomak uza ba atende ema moras.
Ba ninia servisu sosiál no servisu voluntáriu ne’e, nia la sura kolen ka husu osan ba ema sira ne’ebé nia fo atendementu tanba nia konsidera buat ne’ebé nia halo ba ema seluk ne’e hanesan nia halo buat di’ak ba ninia maluk sira.
Avo Ana ho nia kaben, Pastór Vicente de Vasconcelos hanesan fundadór Igreja Kristaun Protestante dahuluk iha Timor-Timur ho naran Igreja Hosana Dili no ativu envolve iha atendimentu igreja.
Iha tinan 1988, Avo Ana partisipa iha Asembleia ne’ebé organiza hosi Persekutuan Gereja–Gereja iha Indonézia ne’ebé hala’o iha Bali, reprezenta feto Igereja Kristaun iha Timor-Timur (GKTT).
Iha tinan 1992, Avo Ana moris hanesan feto faluk, tanba nia laen, Pastór Vicente de Vasconcelos Maromak bolu hikas ba Nia kadunan Santu.
Maski nunee, moris nu’udar feto faluk la hamenus ninia espíritu atu kontinua buat di’ak ne’ebé nia halo ba ema seluk iha mundu.
Jornalista : Antónia Gusmão
Editora : Julia Chatarina
