DILI, 06 setembru 2021 (TATOLI)—Sentru Lojístika Nasionál (CLN, sigla portugés) propoin millaun $4 hodi sosa produtu lokál reforsa stock iha armazen nasionál iha tinan 2022.
“Ami propoin millaun $6 ba kategoria saláriu no vensimentu, bens no servisu no kapitál menor, ne’ebé hosi totál ne’e prevee millaun $4 hodi sosa produtu lokál, nune’e bele hamenus importasaun,” Prezidente CLN, Gervásio Cardoso de Jesus da Silva hateten hafoin reuniaun Komite Revizaun Orsamentu Polítika (KROP), iha edifísiu Ministériu Finansa (MF), segunda ne’e.
Tanba ne’e, parte CLN hakarak partilla informasaun ho ministériu seluk atubele enkoraja povu agrikultór hasa’e produsaun produtu lokál.
“Ami iha hare kulit iha Maliana kuaze tonelada 500, ne’ebé agora iha armazen CLN, hafoin ami sei iha batar. Hein hato’o ba ministériu tutela atu estabelese folin konforme ami tun ba sosa,” nia akresenta.
CLN rasik daudaun halo ona kontaktu ho grupu agrikultór sira iha baze hanesan iha Maliana hodi tun ba sosa no osan ne’e tranfere kedan ba grupu produtór sira-nia konta bankária.
“Ha’u garante agora liuhosi programa Cesta Bázika, produsaun tinan ne’e sa’e tebes, ne’ebé ha’u-nia ekipa no ha’u rasik prepara orsamentu atu sosa, nune’e lori ita-nia agrikultór ba fali natar no to’os,” nia hatutan.
Enkuantu tinan ne’e, CLN preve orsamentu millaun $2 resin hodi sosa produtu lokál.
Jornalista : Natalino Costa
Editora : Julia Chatarina
