COVALIMA, 07 setembru 2021 (TATOLI) – Ministru Justisa (MJ), Manuel Cárceres da Costa hateten, Ministériu Justisa sei suspende vizita família ba Prizaun Covalima tanba pandemia COVID-19.
Notísia Relevante : MJ fó formasaun kona-bá disiplinár ba Guarda Prizionál Covalima
“Ohin ha’u vizita iha sela sira, ha’u husu deskulpa ba sira la’ós kastigu sira, no husu sira-nia kompriensaun ita taka odamatan prizaun provizóriu labele simu lai vizita,” Ministru Manuel Cárceres da Costa, hateten ba jornalista sira, hafoin vizita prizioneiru sira iha sela Prizaun Covalima, tersa ne’e.
Razaun MJ suspende provizóriu vizita família iha prizaun, tanba Covalima implementa serka sanitária no iha Díli implementa konfinamentu obrigatóriu (KO).
Maske guarda prizionál Covalima ho Gleno livre ona hosi COVID-19 maibé sei haree guarda prizionál iha Becora infetadu COVID-19, nune’e MJ evita vizita família ba prizioneiru iha prizaun sira.
Dadus hosi Detetór prizaun Covalima, Julião Dias Ximenes, haktuir prizioneiru iha Covalima hamutuk na’in 102, hosi númeru ne’e kompostu hosi prizaun kondenadu na’in 63, prizaun preventiva 39 no hosi númeru ne’e, prezu na’in ida moras mental no na’in lima defisiente.
Jornalista : Celestina Teles
Editór : Francisco Simões
