DILI, 20 setembru 2021 (TATOLI)–Prezidente Institutu Petróleu no Jeolojia (IPG, sigla portugés) Gabriel Gaspar Aparício de Oliveira, hateten, daudaun ne’e ekipa institutu hahú prepara prosesu aprovizionamentu atubele halo perfurasaun ba bee-moos iha suku Camea, munisípiu Dili.
“Ita hatene bee-moos to’o agora susar iha suku Camea, tanba ne’e ita halo ona estudu aquíferu ne’ebé identifika bee iha rai-okos kuaze 75%, nune’e daudaun tama ona faze prosesu aprovizionamentu atu kompañia manan-na’in halo perfurasaun,” Prezidente IPG informa ba Agência TATOLI, iha edifísiu IPG, Delta, segunda ne’e.
Tuir Gabriel, bainhira perfuransan maka susesu hetan bee, mak foin entrega ba Bee Timor-Leste, Empreza Públika (BTL, E.P) atu jere distribuisaun tuir nia kompeténsia.
Aleinde ne’e, IPG mós sei kontinua halo estudu bee ba área sira iha munisípiu Dili hanesan iha Taibesi, Ailok–laran, Manleuana no fatin seluk.
“Ita hatene área sira ne’e populasaun sira difísil atu asesu bee, nune’e planeia halo estudu aquíferu hodi bele fornese bee ba ita-nia komunidade sira,” Dirijente ne’e akresenta.
Iha tinan oin, IPG mós sei halo estudu aquíferu iha munisípiu Baucau, iha postu Laga, munisípiu Lautém iha suku Mehara inklui Munisípiu Liquiçá, Ermera no Rejiaun Administrativu Espesiál Oé-Cusse no Ambeno (RAEOA).
Jornalista : Natalino Costa
Editora : Julia Chatarina
