DILI, 26 setembru 2021 (TATOLI)–Família Funu na’in, José Antonio Da Costa ‘Ma’Huno Bulerek Karathayano’, konkorda ona atu entrega mate-isin ba Estadu atu organiza serémonia funebre iha Jardín Eroi, Metinaro.
“Maski, falta komunikasaun no koordenasaun entre Estadu no família bainhira prepara fatin iha Muzeu Rezisténsia atu rai mate-isin saudosu, maibé Governu halo ona negosiasaun ho família, ne’ebé ikus mai família hakarak ona atu entrega mate-isin saudosu ba Estadu,” Ministru Asuntu Kombatente Libertasaun Nasionál, Julio da Costa ‘Meta Malik’, hateten, iha Muzeu Rezisténsia, domingu ne’e.
Notísia relavante: Ma’huno Bulerek Karathayano hakotu-iis tanba ataka-kurasaun
Tuir ajenda, família saudosu sei entrega mate-isin ba Estadu iha domingu lorakraik ne’e, tuku 18:00.
Mate-isin saudozu sei rai iha Muzeu Rezisténsia durante loron rua, hahú hosi loron 26 to’o 28 setembru ne’e hodi fó onra ba saudozu nia ba luta libertasaun nasionál, no iha loron 28 setembru dadeer, sai hosi Muzeu Rezisténsia ba Igreja Katedrál hodi realiza Misa Réquiem.
Hafoin misa, Estadu entrega mate-isin ba família hodi halo seremónia kulturál ka sunu ahi mate iha Laleia, Manatuto, hafoin entrega hikas ba Estadu atu kontinua halo seremónia funebre iha Metinaro.
“Ita nia-ekipa halo hela konstrusaun rate iha Metinaro no sei halo seremónia funebre tuir ajenda Estadu,” Ministru Meta Malik akresenta.
Antes ne’e, funu na’in Ma’Huno detetadu pozitivu COVID-19 no hala’o tratamentu iha izolamentu Vera Cruz, maibé konsege rekupera hodi fila bá uma, maibé hetan atakasaun derepente no família transporta ba halo tratamentu iha sala Kuidadu Intesivu Hospital Nasional Guido Valarades (HNGV) iha loron domingu 19 setembru 2021, ikus mai hakotu iis iha loron sesta (24/09) tuku 17:30 otl.
Saudozu Ma’Huno nu’udar antigu Komandante FALINTIL, antigu Sekretáriu Komisaun Diretiva FRETILIN no atuál Primeiru Vise-Prezidente Partidu CNRT.
Ma’huno Bulerek Karathayano, moris iha 14 abríl 1949, hanesan mós Komandante FALINTIL ida ne’ebé la’o hamutuk Komandante ein Xefe, Kay Rala Xanana Gusmão, dezde 1975 to’o 1999.
Jornalista : Florêncio Miranda Ximenes
Editora : Julia Chatarina
Hau hakarak asesu notisia iha website tatoli