DILI, 04 outubru 2021 (TATOLI)—Inspesaun Jerál Traballu (IGT, sigla portugés) rejista kazu infrasaun hamutuk 221 iha fulan-janeiru to’o setembru tinan ne’e.
“Inspesaun Jerál Traballu durante fulan-janeiru to’o setembru halo vizita inspesaun traballu hamutuk 1.220 no empreza hamutuk 1.111, kompostu hosi empreza lokál 193 no empreza estranjeiru 918, ne’ebé hosi totál vizita inspesaun traballu ne’e, hasai 221 auto-notísia ba empreza sira ne’ebé komete infrasaun ba Lei Traballu númeru 4/2012,” Inspetór Jerál Traballu, Rofino Lopes dos Reis, informa ba Agência TATOLI, via telefónika, seguda ne’e.
Tuir Inspetór Jerál, infasaun ne’ebé komete maioria tanba kompañia la tuir regra seguransa saude traballu.
Notísia relevante: IGT deteta konstrusaun loja ida iha Fatuhada komete irregularidade
“Hosi infrasaun 221, kompañia sira kosege selu koema hamutuk $119.045 ba kofre Estadu,” nia akresenta.
IGT hanesan servisu públiku ida, ne’ebé iha dependénsia direta ba membru Governu responsável ba área traballu, ne’ebé halo kontrolu ba norma kondisaun traballu, halo prevensaun risku profisionál, seguransa sosiál, kolokasaun, empregu no protesaun dezempregu, traballu estranjeiru, hanesan norma kontrolu hosi lei ne’ebé atribui ba Inspesaun Jerál.
Área atuasaun IGT mak iha lokál traballu sira hodi haree prosesamentu infrasaun traballu no seguransa sosiál, kontrolu ba planu konstrusaun, transformasaun no modernizasaun estabelesimentu, realizasaun inkéritu asidente traballu no moras grave no mate hosi profisionál sira, no seluk tan liga ho ambiente traballu.
IGT rejista ona kompañia 108 mak taka atividade ekonómika no traballadór lakon serbisu hamutuk 771 tanba situasaun pandemia, hahú tinan 2020 to’o 2021.
Aleinde ne’e, durante halo servisu iha tinan 2020, konsege hatama reseita $273.754, ne’ebé maioria mai hosi multa no auto adverténsia ne’ebé aplika ba kompañia komete infrasaun hamutuk 400 resin.
Iha tinan 2020, IGT halo atividade inspesaun 1.200 no iha atividade ne’e rasik deteta traballadór hamutuk 18.590 maka serbisu iha kompañia.
Jornalista : Natalino Costa
Editora : Julia Chatarina
