DILI, 12 outubru 2021 (TATOLI)-Tuir dadus estatístika hosi Klínika Bairru-Pité fó sai iha fulan-setembru ne’e, rejista kazu má- nutrisaun hamutuk 149 afeta ba labarik ki’ikoan.
“Iha fulan setembru, Klínika Bairru-Pité rejista má-nutrisaun hamutuk 149, na’in neen krónika no balun moderadu. Oras ne’e daudaun iha pasiente balun sei baixa no balun halo tratamentu ne’ebé kondisaun di’ak ona,” Responsavél Progama má nutrisaun iha Klínika Bairru-Pité, Venansia Soares, hateten ba Agência TATOLI via telefónika, tersa ne’e.
Daudaun ne’e, labarik idade fulan neen to’o tinan neen maka afeta makas má nutrisaun no baixa iha klínika ne’e.
Entretantu, Jestór Klínika Bairru-Pité, Inácio dos Santos, informa médiku sira kontinua halo tratamentu ba labarik sira ne’ebé afeta má nutrisaun no fó edukasaun ba inan-aman sira fó hahan nutritivu ba oan-sira.
“Ita mós fó edukasaun sívika ba inan-aman sira fó hahan di’ak ho nuttrisaun ba oan-sira hodi hadook aan hosi má nutrisaun,” Jestór ne’e fó hanoin.
Ministériu Saúde kontinua fó apoiu aihan suplementu hanesan planpinat F70 no F100 hodi distribui ba pasiente má-nutrisaun ne’ebé krónika.
Tuir dadus tinan 2020 hatudu labarik idade tinan lima mai kraik ho má-nutrisaun no raes badak 47,1%, labarik idade tinan lima mai kraik ne’ebé krekas 8.6% no labarik idade tinan lima mai kraik ho todan menus 32.1%.
Iha Timor-Leste populasaun 36% maka iha kondisaun inseguransa aihan grave, ne’ebé 25% maka iha aihan seguru ne’ebé barak liu hela iha Dili.
Indikadór ne’ebé lansa ona iha livru hanaran konsolida ba seguransa no aihan nutrisaun ne’e mak hakarak ema ne’ebé menus nutrisaun 24%, tenke redús ba 0%, tanba daudaun ema inseguransa aihan 36%, nune’e tenke redús ba 0%.
Enkuantu, ema ne’ebé ho ras badak daudaun iha 40%, tanba ne’e ho alvu tenke redús pelumenus 25% to’o tinan 2030 tanba Timór adere ba Objetivu Dezenvovlimentu Sustentavel (ODS) no iha mós Planu Estratéjiku Dezenvolvimentu Nasionál (PEDN) ne’ebé ko’alia katak to’o 2030 ema hotu iha nutrisaun di’ak no aihan hotu tenke seguru.
Notísia Relevante : Klínika Bairru-Pité Rejista Kazu Má-Nutrisaun Maioria ba Labarik
Jornalista : Felicdade Ximenes
Editór : Florencio Miranda Ximenes
