VIQUEQUE, 20 outubru 2021 (TATOLI)–Protesaun Sivil no Cruz Vermelha de Timor-Leste (CVTL, sigla portugés) iha Viqueque, kuarta ne’e, distribui nesesidade emerjénsia ba vítima dezastre naturál hamutuk uma-kain haat, iha suku Uaimori, postu administrativu Viqueque villa, munisípiu Viqueque.
“Ohin Protesaun Sivil hamutuk ho CVTL halo verifikasaun no fó apoiu ba vítima udan no anin-boot, ne’ebé akontese iha loron 15 no 16 outubru 2021, iha aldeia Uma-liurai iha uma-kain tolu no aldeia Lulei uma-kain ida, iha suku Uaimori,” Koodenadór Protesaun Sivil Viqueque, Cerilo Soares Gomes, informa ba Agência TATOLI, iha suku Uaimori.
Nesesidade bázika ne’ebé fornese ba vítima dezastre naturál mak hanesan mina, foos, supermi, balde, dose biskuit, lona, sanan, tasu, kanuru, no bikan.
“Ami haree uma ne’ebé anin estraga ne’e, uma tolu ho kategoria a’at kama’an no iha uma ida maka a’at totál,” nia haktuir.
Daudaun ne’e autoridade lokál halo ona proposta ba nasionál hodi vítima sira hetan materiál konstrusaun.
Jornalista : Vitorino Lopes da Costa
Editora : Julia Chatarina
