DILI, 13 novembru 2021 (TATOLI)–Prezidente Conselho de Imprensa (CI), Virgílio da Silva Guterres, motiva jornalista sira atu kontinua servisu ho profisionál divulga informasaun ba públiku, maski la konkorda ho montante suplementu remuneratóriu ba jornalista liña frente ne’ebé hala’o knaar mitiga COVID-19.
“Jornalista iha karteira profisionál ona, tanba ne’e sira profisionál no iha skill, entaun atribuisaun subsídiu ba profisionál seluk hetan boot liu, enkuantu jornalista ho montante $5 ba loron ida, pesoalmente hanoin ne’e injustisa boot ba profisaun, la’ós ba jornalista, maibé ba profisaun jornalista,” Prezidente CI hateten hafoin halo abertura ba kongresu extraordináriu Timor-Leste Press Union (TLPU), iha Delta Nova, sábadu ne’e.
Tuir Virgílio Guterres, montante osan ne’ebé atu atribui ba jornalista, la’ós atu boot liu médiku maibé tenke konsidera serbisu profisionál ne’e importante.
“Labele haluha katak profisaun jornalista ne’e iha demokrasia hetan previléjiu atu serví públiku ho informasaun,” nia akresenta.
Notísia relevante: Governu kria subsídiu ba profisionál dezenvolve atividade jornalístika durante mitigasaun COVID-19
Nia mós nota katak, durante COVID-19 no impozisaun konfinamentu domisiliáriu obrigatóriu no serka sanitária, enkuantu ema hotu hela iha uma, jornalista sira mak sakrifika-an atu kontinua halo kobertura iha sentru kuarentena no fatin risku seluk hodi divulga informasaun ba públiku.
“Ida-ne’e hatudu sira iha risku, entaun bazeia ba ida-ne’e labele konsidera jornalista tama iha grupu ne’ebé non skill. Jornalista labele sente dezanima ho ida-ne’e, maibé tenke kontinua ko’alia ba injustisa ne’e no labele halo ita lakon ita-nia ánimu tanba ita servisu la’ós ba osan $5 ne’e, maibé tanba ita-nia responsabilidade atu serví públiku, se lae ema hateten katak ita-nia servisu ne’e tanba osan,” nia subliña.
Haree ba situasaun ida-ne’e, CI enkoraja TLPU no Asosiasaun Jornalista Timor-Leste (AJTL), liuhosi responsável organizasaun, hodi halo komunikasaun di’ak ho Governu liuhosi Ministériu relevante hodi rezolve kestaun ne’e.
“Bainhira osan laiha, di’ak liu lalika fahe no husu ba kompañia sira ne’ebé jornalista sira serbisu ba atu haree, la’ós Governu halo deklarasaun ida to’o ema hein kleur, ikus mai sai ho desizaun ida deskriminativu no halo ema dezanima, di’ak liu lalika,” Virgílio Guterres dehan.
Hatan ba kestaun ne’e, Ministru Asuntu Parlamentár no Komunikasaun Sosiál, Francisco Jerónimo, hateten, razaun define montante kada loron $5, tanba haree ba situasaun ne’ebé la’o ona.
“Iha tinan 2020 bainhira ha’u mai asume knaar ne’e, ami halo lei ida atu atribui subsídiu ba jornalista, maibé hetan protesta hosi jornalista sira tanba barak la hetan, entaun halo oinsá mak bele akomoda ema hotu, entaun iha nosaun katak atu akomoda hotu ne’ebé halo serbisu iha liña frente iha fatin ne’ebé de’it, presiza halo ezersísiu ida kona-ba montante, nune’e bele to’o ba ema hotu,” Ministru informa hafoin enserra kongresu extraórdinariu Timor-Leste Press Union (TLPU).
Iha kinta (11/11) liuhosi reuniaun Konsellu Ministru (KM), aprova Projetu Dekretu-Lei ba kriasaun subsídiu profisionál sira ne’ebé dezenvolve atividade jornalístika, ne’ebé profisionál sira ne’e hala’o funsaun ho forma ezemplár hodi kontribui ativamente ba divulgasaun informasaun ne’ebé kredível no nesesária kona-ba prevensaun no kombate pandemia iha territóriu nasionál.
Nune’e, diploma ne’e sei haruka ba Prezidente Repúblika hodi promulga iha segunda (15/11).
Aleinde ne’e, iha kongresu extraordináriu TLPU hamosu rezolusaun no rekomendasaun ba Governu liuhosi MAPKOMS, atu halo revizaun ba Projetu Dekretu-Lei ba kriasaun subsídiu profisionál ne’ebé hala’o atividade jornalístika durante mitigasaun COVID-19, tanba la konkorda ho montante ne’ebé mensiona.
Jornalista : Arminda Fonseca
Editora : Julia Chatarina
