DILI, 13 janeiru 2022 (TATOLI)—Sekretáriu Estadu Kombatente Libertasaun Nasionál (SEAKLN), Gil da Costa ‘Oan Soru’, hateten fundu kontributivu veteranu sira-nian to’o ohin loron hamutuk millaun $20-resin iha kota fundu veteranu nian ho benefisiáriu hamutuk 27.828.
Notísia Relevante: SEAKLN relata polítika kria fundu veteranu nian ba PM
“Fundu kontributivu veteranu nian to’o agora hamutuk millaun $19-resin ho nia funan hamutuk $299.000, nune’e totál hamutuk millaun $20-resin iha konta fundu veteranu nian ho benefisiáriu hamutuk 27.828. Fundu kontributivu veteranu nian ne’e implementa hahú iha janeiru 2020,” Gil da Costa ‘Oan Soru’ hateten ba Agência Tatoli, iha nia knaar fatin Caicoli, Dili, kinta ne’e.
Entretantu fundu investimentu veteranu nian ne’e, Oan Soru hateten, Ministériu Asuntu Kombatente Libertasaun Nasionál (MAKLN) sei iha faze diskusaun ba regulamentu implementasaun fundu, maibé atu implement aka jere ba área ne’ebé hetan retornu nune’e bele hetan nia rendimentu no bele sustentavel.
Notísia Relevante: Fundu investimentu veteranu akumula ona millaun $15
Maibé, tuir nia, asuntu ida-ne’e sei iha faze diskusaun ba regulamentu no aban bainrua sei aprova, nune’e bele haforsa no bazea ba nia regulamentu mak hafoin bele halo nia implementasaun ba área ne’ebé sei define tempu oin mai.
Posibilidade, nia dehan, iha inísiu fulan-fevereiru tinan 2022 ne’e bele aprova ona regulamentu implementasaun ba fundu kontributivu veteranu nian.
Objetivu halo konta fundu kontributivu veteranu ne’e ho razaun katak osan ne’e sei fó benefísiu ba nia na’in rasik no ba nia jerasaun sira iha futuru.
Ezemplu, bainhira kuda batar ba rai depende ba nia fulin boot ka kiik maibé depende mós ba rai nia bokur no udan-been di’ak, maibé nia nafatin batar sei la transforma ba haree. Ida-ne’e mak konseitu ne’ebé mak veteranu sira komunga hodi hakat ba oin liuhosi sira-nia kua osan ne’e.
Kona-ba dedikasaun eskluziva veteranu nian, Oan Soru esplika, laiha númeru ida permanente tanba nia prosesu balun loos ona no sei hadi’a fali, tanba ne’e seidauk iha númeru serteza ka definitivu atu informa.
Antes implementa polítika ne’e, SEAKLN hala’o ona sensibilizasaun ba veteranu sira iha munisípiu sira hotu no iha nasionál ne’ebé sai benefisiáriu simu pensaun hosi Estadu hodi hetan aseitasaun ho ema 6.667.
Nune’e mós, liuhosi primeiru kongresu konsellu nasionál kombatente libertasaun nasionál aprova deliberasaun númeru 01 primeira kongresu CLN iha loron 21 dezembru 2019, hodi fó kbiit ba SEAKLN hahú implementa polítika kriasaun fundu investimentu ba veteranu.
Entretantu Prezidente Konsellu Veteranu, Vidal de Jesus ‘Reak Leman’, hateten partisipasaun veteranu nian iha oin rua, ida mak partisipasaun totál no partisipasaun tempu inteiru mak tama iha dedikasaun eskluziva ne’e hanesan nia iha baze apoiu, iha ne’ebá haree inimigu no buat seluk nia labele halo maibé inimigu kaer hatama kadeia.
“Ita haree veteranu ne’ebé dedika-aan iha klandestina to’o inimigu kaer tama kadeia ne’e, ita nafatin tau-matan no barak mak iha mudansa tanba hetan ona pensaun hosi Governu. Osan ne’ebé sira simu loke kioske hodi faan sasán nesesidade bázika. Ida-ne’e mak sira halo iha sira-nia moris loron-loron nian,” nia dehan.
Notísia Relevante: Fundu investimentu veteranu sei la lakon
Jornalista : Osória Marques
Editór : Cancio Ximenes
