DILI, 02 fevereiru 2022 (TATOLI)—Prezidente Repúblika no Komandante Supremu Forsa Armada, Francisco Guterres Lú Olo, fó onra no orgullu boot prezide serimónia komemorasaun loron FALINTIL-FDTL, ne’ebé sei inklui mós serimónia tomada pose ba knaar aas liu iha ierarkia militár, hodi hametin koezaun no unidade Estadu nian no haforsa identidade timor-oan.
Notísia Relevante: Prezidente Repúblika fó pose ba Tenente Jenerál Falur
“Dezde kedas ha’u simu knaar nu’udar Komandante Supremu Forsa Armada ne’ebé Konstituisaun fó ba Prezidente Repúblika, ha’u sempre buka haka’as an atu hametin koezaun no valorizasaun Forsas Armadas, tanba konsidera nu’udar importante tebes hodi hametin koezaun no unidade Estadu nian no haforsa identidade timor-oan. Ne’e hanesan objetivu ida-ne’ebé tenke hetan konsiderasaun prioritáriu hosi ajente no responsavel polítiku tomak,” Komandante Supremu Forsa Armada ne’e hateten iha ninia diskursu iha serimónia fó pose ne’ebé hala’o iha Kuartél Jenerál Fatuhada, iha ámbitu komemorasaun loron transformasaun FALINTIL ba FALINTIL-Forsa Defeza Timor-Leste (F-FDTL) ba dala-21 (02 fevereiru 2000-02 favereiru 2022), kuarta ne’e.
Transformasaun no mudansa hala’o ho rítmu ne’ebé aas tebes no prosesu renovasaun ba kargu akontese tanba Forsa Armada liu hela prosesu dezenvolvimentu no modernizasaun, tanba ne’e mak tenke haree mudansa ba Komandante Militár ho pozitivu no fiar metin, nu’udar situasaun baibain ida no mudansa hirak-ne’e hanesan prosesu naturál ida, ne’ebé akontese beibeik ona ba ita-nia lideransa militár dezde kedas restaurasaun independénsia.
“Ita tenke haree mós ba mudansa ida-ne’e hanesan sinál konfiansa hosi podér polítiku ba iha instituisaun militár no mós ba iha kapasidade lideransa xefia sira-nian no iha tempu hanesan, sai hanesan insentivu ida ba ita-nia militár sira atu dezenvolve espetativa ba progresaun iha karreira militár,” nia dehan.
Mudansa hirak-ne’e hatudu momoos no loloos Komandante Supremu Forsa Armada nia konfiansa ba iha instituisaun FALINTIL-FDTL no mós ninia kbiit ne’ebé Konstituisaun fó nu’udar Xefe Estadu.
Hodi hakat liu dezafiu hosi transformasaun institusionál ne’ebé buka valoriza di’ak liután FALINTIL-FDTL, presiza haburas kompeténsia lideransa no prepara komandante sira aban-bainrua nian, atu nune’e bele prontu atu hakat liu obstákulu sira-ne’ebé karik sei mosu iha tempu oin mai no hamorin Instituisaun Militár nia naran ba beibeik.
Ida-ne’e sai ona hanesan imperativu no marku importante tebes ida iha prosesu gerrilla nakfila ba Forsa Defeza Timor-Leste FALINTIL- FDTL.
Iha prosesu transformasaun hirak-ne’e, buat barak mai hosi vizaun no lideransa hosi Forsa nia Komandante sira, Majór-Jenerál Taur Matan Ruak no Tenente-Jenerál Lere Anan Timur, ne’ebé sai ona nu’udar inspirasaun no ezemplu di’ak ba jerasaun foun sira.
“Ba sira, ha’u hato’o obrigadu wa’in,” Xefe Estadu ne’e hateten.
Loron 02 fevereiru, Timor-Leste selebra aniversáriu FALINTIL-Forsas Defeza Timor-Leste ba dala-21 no iha loron ne’e Timor-Leste hanoin hikas momentu istóriku hosi ninia estabelesimentu iha Aileu nu’udar susesór lejítimu ba glorioza FALINTIL, katak Frente Armada ne’ebé tuba rai metin ho espíritu asswa’in hodi luta ho nia kbiit rasik hasoru okupasaun militár Indonézia iha Timor-Leste durante tinan 24 nia laran.
Buat ne’ebé FALINTIL, hanesan servidór Estadu, husik hela nu’udar legadu di’ak ida ba Timor-Leste mak Pátria nia independénsia, hamutuk ho prinsípiu no valós sira-ne’ebé kesi timor-oan hamutuk no sai nu’udar aliserse loloos ba Timor-Leste nia Estadu Direitu Demokrátiku.
“Ha’u hakarak hato’o saudasaun ba militár no sivíl sira-ne’ebé loro-loron serbisu ho dedikasaun no empeñu tomak no kumpre misaun sira-ne’ebé mak fó ba sira atu hala’o, ho neon no laran tomak, hodi defende Timor-Leste. Ha’u agradese mós imi ida-idak ne’ebé hola parte iha serimónia ida-ne’e, liuliu ita-nia militár no eis-kombatente sira, nasaun deve barak tebes ba sira,” nia hateten.
Jornalista : Nelson de Sousa
Editór : Cancio Ximenes
