DILI, 14 marsu 2022 (TATOLI)—Plan Internasionál, segunda ne’e, apoiu materiál emerjénsia ba Ministériu Edukasaun Juventude no Desportu (MEJD) hodi hadi’a infraestrutura eskola balun iha territóriu nasionál ne’ebé a’at tanba afetadu dezastre naturál no antes ne’e ho kondisaun a’at.
Diretór Jerál Planu Polítika no Inkluzaun hosi MEJD, Raimundo José Neto, agradese ba tulun parseiru dezenvolvimentu no kompromete sei uza ho di’ak.
”Iha eskola barak kondisaun a’at liu fali hosi ida-ne’ebé hetan implikasaun hosi dezastre naturál. Tanba ne’e bazeia ba aprezentasaun hosi Diresaun Nasionál Infraestrutura, temi katak infraestrutura eskola ne’ebé a’at la’ós de’it tanba dezastre naturál,” Diretór Raimundo hateten durante seremónia entrega materiál, iha edifísiu Villa verde, segunda ne’e.
Notísia relevante: Eskola EBC Bidau Akadiruhun hahú ona prosesu reabilitasaun sala rua
Plan International fornese materiál emerjénsia hanesan kalen hamutuk 700, pregu xapeu kilograma 100, ai 6×10 unidade 650, inklui ai 5×10 unidade 150.
Tuir Raimundo, tinan rua liubá, bainhira Ministru Edukasaun Juventude no Desportu, Armindo Maia, vizita postu administrativu Hatulia B, munisípiu Ermera, identifika iha eskola balun ho kondisaun grave.
“Iha eskola ida tidin besi iha eskola ida, ne’ebé ninia kondisaun ne’e la’ós anin ka udan maka sobu, maibé a’at antes ona. Eskola ne’e halo liuhosi programa ministériu, maibé kalen no ai barak mak dodok no estraga ona,” nia akresenta.
Tanba ne’e, apoiu hirak ne’e hodi kompleta no hadi’a kondisaun infraestutura eskola sira ne’ebé estraga ona.
Iha biban hanesan, Diretór Nasionál Asaun Sosiál Eskolár hosi MEJD, Joaquim Martins, konsidera, Plan International hanesan parseiru ne’ebé ajuda tebes ministériu, liuliu iha área kapasitasaun no prevensaun dezastre, ne’ebé sempre fó apoiu materiál emerjénsia.
“Edukasaun Timor-Leste hetan afeitu dezastre naturál iha tinan 2020-2022, liuliu infraestrutura iha eskola 68 hetan estraga. Hosi númeru ne’ebé iha, hahú hosi tinan 2020-2021 ita apoiu ona materiál emerjénsia ba eskola hamutuk 36 no iha tinan 2022, Diresaun Nasionál Asaun Sosiál Eskolár fó apoiu materiál emerjénsia ba eskola ne’ebé afetadu hamutuk sia, enkuantu eskola 23 seidauk hetan apoiu,” Diretór ne’e haktuir.
Nune’e, apoiu ne’ebé fornese tanba koordenasaun di’ak, ne’ebé parte MEJD konsege aprezenta proposta ba Plan international atubele hakma’an todan.
“Apoiu ne’ebé Plan Internationál fó ona ba ministériu hatudu ona sira-nia fuan boot atu kontinua fó tulun, atu garante prosesu ensinu aprendizajen iha eskola sira,” nia salienta.
Nune’e mós, Diretór Nasionál Plan International, Dilyana Ximenes, relata, parseiru dezenvolvimentu ne’e, hahú iha tinan 2010 kedan iha vontade boot tebes hakarak serbisu hamutuk ho MEJD liuhosi atividade dezenvolvimentu no tempu emerjénsia.
“Plan International no Ministériu Edukasaun Juventude no Desportu, hahú iha tinan 2010, kolabora hamutuk hodi foku ba edukasaun no simulasaun sedu, liga ba edukasaun pre-eskolár komunidade iha munisípiu Aileu no Ainaro, hanesan kontinua foku ba programa hanaran mobile library, ne’ebé karreta lori livru halo simulasaun ba labarik feto no mane sira iha munisípiu ne’e,” nia dehan.
Programa mobile library atu haforsa abilidade literasia, imajinasaun, no kreatividade liuhosi biblioteka hale’u, ne’ebé maka Plan International realiza hela, ne’ebé atividade ne’e rasik sei realiza durante tinan-lima nia laran.
“Ami mós serbisu hamutuk ho ministériu ba programa eskola seguru, ne’ebé hetan fundu hosi United Nations Children’s Fund (UNICEF),” nia akresenta.
Nune’e mós, iha oportunidade ida-ne’e parseiru dezenvolvimentu ne’e apresia ho kolaborasaun MEJD durante tinan 10 nia laran, hodi bele lori susesu ba atividade sira.
Jornalista : Tomé Amado
Editora : Julia Chatarina
