DILI, 19 marsu 2022 (TATOLI)—Pasiente balun iha Hospital Nasionál Guido Valadares (HNGV), la ezerse nia direitu votu iha eleisaun Prezidensiál tanba naran laiha lista hosi Sekretariadu Tékniku Administrasaun Eleitorál (STAE), maske sira rejista ona.
Pasiente Francisco Guterres, hateten nia parte baixa desde semana rua ona iha HNGV, nune’e parte STAE hamutuk ho dirijente HNGV foti ona nia naran atu ezerse direitu iha eleisaun prezidensiál.
“Maibé derepente de’it ohin ha’u atu vota, ema dehan ita bo’ot sira naran laiha lista atu vota. Ha’u lamenta tebes tanba saida mak situasaun sira ne’e mosu hodi halo ami lakon direitu votu”, pasiente ne’e lamenta iha áredór HNGV, sábadu ne’e.
Nia konsidera órgaun eleitorál halo violasaun boot ba sira nia direitu atu vota iha momentu demokrátiku nu’udar sidadaun Timor-Leste.
“Ha’u lakon direitu hanesan sidadaun tanba eleisaun tinan lima dala ida, ida ne’e maka halo ha’u triste bainhira la tuir votasaun”, dehan nia.
Iha biban hanesan, pasiente Januario Simoes mós lamenta tanba nia rasik la tuir eleisaun iha sentru votasaun movél ne’ebé realiza iha HNGV.
“Ha’u bele hateten servisu STAE ne’e la loos no la imparsiál tanba ami ne’ebé baixa ne’e sidadaun Timor-Leste no ami baixa iha ne’e kleur ona, dezde iha loron 15 no iha momentu ne’e ba kedan ema foti ami nia kartaun dehan ami atu tuir votasaun iha ospitál de’it, maibé realidade hatudu katak ohin loron 19 marsu ami laiha direitu votu”, nia lamenta.
Diretór Jerál Administrasaun HNGV, Raul Humberto Gama, hateten família pasiente no pesoál saúde konsege ezerse nia direitu iha sentru votasaun movél ne’ebé maka parte STAE no HNGV organiza.
“Pasiente no família pasiente iha HNGV hamutuk 472, maibé sira ne’ebé tuir iha balun de’it, no balun la tuir eleisaun tanba problema iha lista. Doutór inklui funsionáriu ne’ebé rejista iha HNGV atu tuir votasaun mak 636, maibé sira ne’ebé tuir vota bazea ba lista definitiva ne’ebé bele tuir votasaun iha HNGV hamutuk 150”, nia akresenta.
Pasiente no pesoál saúde inklui família pasiente ne’ebé la vota ne’e respsabilidade STAE nian tanba lista ne’e hosi ne’ebá no la ho baze ba lista ne’ebé antes HNGV submete.
“Ita boot sira bele ba husu iha STAE kona-ba lista pasiente, família pasiente, pesoál saúde sira ne’ebé maka la vota”, nia afirma.
Notísia relevante: Eleitór balun lamenta naran la sai iha sentru votasaun paralelu STM
Jornalista : Natalino Costa
Editór : Florencio Miranda Ximenes
