BOBONARO, 23 marsu 2022 (TATOLI) – Estudante hamutuk na’in-300 resin iha eskola sekundária Sentru Aprendizajen no Formasaun Eskolár (CAFE, sigla portugés) Maliana, munisípiu Bobonaro ho idade 12 ba to’o 17, kuarta ne’e simu vasina Pfizer doze dahuluk hodi aumenta imunidade isin luta kontra Covid-19.
Xefe Departamentu Programátiku Servisu Saúde Munisípiu Bobonaro, Paulina de Assunção Perreira Deneire, hateten objetivu hosi implementa programa vasina ne’e atu proteje labarik sira hosi moras todan no mate kauza hosi Covid-19 no prevene labarik sira hodi hamenus posibilidade variante foun ne’ebé sei mosu mai.
“Vasina ida-ne’e efeitu tebes tanba hafoin loron hitu simu doze dahuluk ninia efikásia atu proteje labarik sira-nia isin ne’e 95% ba idade 12 até 16 no ba sira-ne’ebé mak idade 12 até 15 hatudu ninia efikásia ne’e 100%, ne’ebé husu ba inan-aman sira atu labele ta’uk atu oan sira simu vasina, tanba ne’e seguru ba labarik sira-nia saúde atu proteje-aan hosi pandemia Covid-19,” nia informa ba jornalista sira, iha eskola CAFE, Maliana.
Diretora CAFE Maliana, Martina Sejarinha da Costa Soares, sente kontente tanba molok implementa vasina serbisu saúde munisípiu Bobonaro halo uluk advokasia ba estudante no inan-aman sira hafoin ida-ne’e entrega karta konsientimentu nune’e ohin foti desizaun ba oan sira atu simu vasina.
“Lista ne’ebé ami submete ba saúde sira totál estudante na’in-336, maibé depois ami fó karta ba iha inan-aman iha estudante 20-resin mak sira-nia família la aseita atu simu vasina, ne’ebé ohin loron iha estudante na’in 300-resin mak simu ona vasina doze dahuluk,” nia agradese.
Entertantu estudante Renalia Barreto de Carvalho, hateten molok simu vasina nia sente tauk tanba rona informasaun ne’ebé espalla iha mídia sosiál katak vasina bele hamate ema-nia vida no bele hamosu reasaun seluk iha ema-nia isin lolon.
“Ami-nia inan-aman sira-nia korajen ohin loron, ha’u mós prontu ona simu vasina, ha’u sente kontente tebes maske foin simu primeiru sente moras oituan, maibé ha’u fiar katak vasina ne’e mak bele proteje ha’u-nia isin hosi moras Covid-19 no bainhira ita la’o dook ba fatin ruma la ta’uk ona moras ne’e atu kona tán,” nia katak.
Renalia mos husu ba estudante sira seluk iha munisípiu Bobonao atu labele ta’uk hakbesik-aan simu vasina, tanba iha períodu Covid-19 vasina mak únika solusaun atu aumenta forsa isin hodi proteje no luta hasoru moras ne’e.
Tuir dadus ne’ebé servisu saúde munisípiu Bobonaro enumera totál estudante alvu ne’ebé elijivel simu vasina Pfizer doze dahuluk na’in-17,082,vasina ne’e rasik lansa ona iha semana kotuk, hahú hosi Eskola Bázika Sentrál númeru II Maliana no Eskola Sekundária no dadaun ne’e estudante besik 700 mak sumu ona.
Jornalista : Sérgio da Cruz
Editór : Evaristo Soares Martins
