DILI, 13 abríl 2022 (TATOLI)–Administradór Munisípiu Ataúro, Domingos Soares, hateten iha ninia mandatu ba dahuluk ne’e nia sei fó prioridade ba edukasaun, saúde, infraestrutura no agrikultura.
Notísia Relevante: Governu aprova Fundu Espesiál Dezenvolvimentu Ataúro
“Munisípiu Ataúro nia programa prioridade mak prestasaun servisu iha área edukasuan, saúde, infraestrutura no ita sei konsentra mós iha agrikultura nian maibé ida-ne’e ba futuru,” Domingos Soares hateten ba Agência TATOLI, via telefónika, kinta ne’e.
Administradór ne’e hatutan, Ataúro sai munisípiu tanba iha setór ekonómia no turizmu, maibé atu halo dezenvolvimentu ne’e iha futuru no agora ne’e foku liu ba instalasaun nian.
“Agora ita foku uluk mak estrutura katak administradór ho nia administrasaun servisu sira ne’ebé mak presiza iha hodi bele funsiona ona servisu ida-ne’e, nune’e setór ida-ne’ebé mak atu dezenvolve mak ekonómia no turizmu nian,” nia dehan.
Atu dezenvolve setór ekonómia iha rai Ataúro mak diversifika ekonómia iha merkadu.
Tuir nia, bainhira sai administradór ida iha munisípiu mak tenke iha nia obstakulu no iha mós opurtunidade tanba rua ne’e sempre la’o hamutuk ho programa iha institituisaun ida-nia laran.
“Tanba kuandu instituisaun ida foin harii konserteza sempre iha dezafiu tanba ne’e administrasaun Estadu iha nasaun ida-nian maibé la’ós Ataúro mak tutur mesak maibé Estadu nian. Iha opurtunidade mak ita tenke dezenvolve ita-nia rain liuhosi setór sira-ne’ebé mak iha liu-liu iha ekonómia no turizmu nian,” nia dehan.
Programa prisipál ne’ebé mak Governu hatuur ona tuir kompeténsia iha lei númeru 3/2016 kona-ba estatutu administrasaun munisipál no desentraliazaun administrativa no kompetensia adisionál ne’ebé mak prevee iha dekretu-lei 4/2022, dekretu lei mak hodi kria munisípiu Ataúro.
Iha tinan 2022, Governu prevee orsamentu ba Ataúro nu’udar munisípiu foun, ho montante $2.508.100, kompostu hosi saláriu no vensimentu $484.932, bens no servisu $990.797, kapitál menór $728.100, kapitál dezenvolvimentu laiha, no transferénsia públika $304.271.
Iha loron 09 marsu 2022, Governu nomea Domingos Soares hodi asume kargu Administradór munisípiu Ataúro iha rejime komisaun servisu, ba períodu tinan-tolu, sura hosi loron simu pose.
Antes ne’e, iha loron 31 maiu 2021, Parlamentu Nasionál aprova Proposta-Lei Divizaun Administrativa Territóriu ho unanimidade, nune’e, Loré no Hatulia B sai postu administrativu foun no Ataúro sai munisípiu foun iha 01 janeiru 2022.
Munisípiu Ataúro iha suku lima hanesan Beloi, Biqueli, Macadade, Maquili no Vila Maumeta ho nia aldeia hamutuk 19. Totál populasaun iha Ataúro hamutuk 11.744 ne’ebé kompostu hosi feto 5.509 no mane 5.715.
Notísia Relevante Governu nomea Domingos Soares lidera munisípiu Ataúro
Jornalista : Osória Marques
Editór : Cancio Ximenes
