DILI, 13 abríl 2022 (TATOLI)—Sekretariadu Tékniku Adminitrasaun Eleitorál (STAE), hamutuk ho Komisaun Nasionál Eleisaun (CNE-sigla portugés), kuarta ne’e, distribui ona materiál sensitivu ba eleisaun segunda volta nian ba munisípiu no diáspora.
“Ohin, loron 13 abríl ne’e, ita lori halo distribuisaun materiál sensitivu ba munisípiu 12 no Rejiaun Administrativa Espesiál Oé-Cusse Ambeno (RAEOA) inklui diáspora,” Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, hateten liuhosi serimónia distribuisaun ba materiál sensitivu iha, Caicoli, Dili.
Diretór ne’e haktuir, materiál sensitivu hirak-ne’e sei transposta ba munisípiu no halo verifikasaun hodi halo pakote mak hafoin iha loron 18 abríl mak STAE munisipál transporta fali ba sentru votasaun sira iha kada suku no postu administrative sira.
Entretantu, nia informa, atu transposta materiál sensitivu ba Austrália ne’e materiál hirak ne’e sei rai iha STAE no iha 15 abríl mak sei transporta tanba defende ba voo ne’ebé disponível.
“Materiál ne’e ita asegura iha ne’e to’o iha loron 15 abríl mak ita transporta hodi halo eleisaun segunda volta nian iha Austrália,” nia esplika.
Nia informa, kona-ba bulletin votu ne’e,STAE kontinua prodús tuir kuantidade eleitór iha eleisaun primeira volta nian no aumenta eleitór foun hamutuk 312 depois sei aumenta prodús tan 10%.
Prezidente Komisaun Nasionál Eeleisaun (CNE, sigla portugés), José Agostinho da Costa Belo, kontinua enkoraja eleitór atu tuir eleisaun prezidensiál segunda volta nian iha 19 abríl 2022 ho másimu.
“Ho distribuisaun materiál sensitivu ne’e ita tenke korajen nafatin atu eleitór vota ho loloos no partisipasaun ho másimu iha eleisaun,” nia dehan.
Liga ba distribuisaun materiál sensitivu ba eleisaun prezidensiál 2022, nia husu Timor oan tenke fiar malu no la’o tuir lei no regra ne’ebé iha no husu ba parte seguransa atu koordena malu, karik buat ruma akontese labele tau informasaun iha mídia sosiál.
Ministériu Administrasaun Estatál (MAE), Miguel Pereira de Carvalho, hateten eleisaun Prezidente Repúblika nasaun ida-nian sai importante no tenke fó biban ba eleitór timor-oan sira atu ezerse sira-nia direitu votu ne’ebé konsagra iha Konstituisaun.
Ho kompromisiu ida-ne’e mak Governu hakarak asegura liuhosi operasaun ba iha distribuisun no transporta materiál sira-ne’e ba sentru votasaun hamutuk 1.200 no estasaun votu hamutuk na’in 1.500 iha rai-laran no diáspora nian, no eleitór iha territóriu nasionál hamutuk 859.613.
Prezidente Konsellu Diretiva Imprensa Nasionál Timor-Leste, Institutu Públiku (INTL, I.P), Jaime Fernando Correia, hateten atu evita bulletin votu nakles ka noda ne’e, sira husu ba STAE atu hasai tiha kaixa para bainhira foti sai bulletin votu labele nakles.
Relasiona ho bulletin votu nakles, nia dehan, tanba parte ne’ebé mak tula bulletin votu liu kaixa rua entaun konserteza bulletin votu bele nakles.
“Ida-ne’e, ami husu atu evita tenke hasai kaixa, nune’e bainhira hasai bulletin votu labele nakles. Ami rekonese katak iha eleisaun prezidensiál primeira volta iha bulletin votu ne’ebé ho nia medida balun boot no kiik, depois iha livru balun buletin votu to’o de’it tahan 49 no balun liu to’o 51. Ne’e ami rekonese no ami hakarak hadi’a tanba tempu badak no ami-nia funsionáriu natoon de’it,” nia dehan.
Komandante Jerál Polísia Nasionál Timor-Leste (PNTL), Komisáriu Faustino da Costa, hateten misaun prinsipál balun ne’ebé halibur parte hotu atu halo distribuisaun materiál sensitivu ba munisípiu sira inklui RAEOA.
“Tanba ne’e, hahú asegura kedas materiál sensitivu hosi fatin ne’e to’o simu rezultadu eleisaun segunda volta nian no mós responsabilidade ida-ne’e autoridade lokál, PNTL munisipál inklui sira-ne’ebé iha sentru votasaun nian hotu katak sei asegura di’ak to’o hetan rezultadu finál apuramentu iha CNE,” nia dehan.
Eleisaun segunda volta ne’ebé sai kontinuasaun ba eleisaun primeira volta nian, nai dehan, karik iha erru ka fallansu balun ita hotu frekuenta hasoru entaun iha oportunidade ne’e ita hamutuk hodi hadi’a no halo di’akliu fali iha ronde dahuluk liubá ne’e.
Jornalista : Osória Marques
Editór : Cancio Ximenes
